"Гаворыць і паказвае Віцебск"

Источник материала:

Сёння ў 20.30 у Летнім амфітэатры распачнецца цырымонія ўрачыстага адкрыцця 20 юбілейнага міжнароднага фестывалю мастацтваў "Славянскі базар у Віцебску". "Гаворыць і паказвае Віцебск!" — традыцыйна такімі словамі вядучыя цырымоніі звяртаюцца са сцэны Летняга амфітэатра да гледачоў.

Будзе дадзены афіцыйны старт юбілейнаму фестывалю, і Віцебск стане месцам сустрэчы "зорак", людзей з розных краін свету.

Фестывальны марафон распачаўся яшчэ ў сераду канцэртам знакамітага французскага калектыву "Спейс". Маэстра Дзідзье Маруані, той самы, які стварае "зорныя" музычныя кампазіцыі, падчас выканання сваіх твораў быццам бы "ўзняўся" разам з фестывальным горадам у космас. Дарэчы, афармленне галоўнай сцэнічнай пляцоўкі "базару" сёлета вельмі незвычайнае: панелі, якія мяняюць колер, як хамелеон, яшчэ і рухаюцца. Такі насамрэч "космас" атрымаўся.

Учора ў Летнім амфітэатры адбыліся канцэрты Надзеі Кадышавай і ансамбля "Залатое кальцо", а таксама юбілейны канцэрт арт-гурта "Хор Турэцкага".

Сёння ў канцэрце адкрыцця "базару" заяўлены такія "зоркі", як Мікалай Баскаў, Дзіма Білан, Валерый Лявонцьеў, Стас П'еха, "Сябры", "Песняры", Ігар Лучанок і іншыя. Дарэчы, падчас фестывалю на "алеі зорак" ля амфітэатра ва ўрачыстай абстаноўцы адбудзецца адкрыццё "зоркі" Ігара Лучанка. Уважлівыя мінакі, дарэчы, маглі назіраць, як маэстра ўжо падыходзіў да сваёй "зоркі". І яму было прыемна, што яго заслугі перад мастацтвам так высока ацанілі. Нагадаю, на алеі ўжо ёсць "зоркі" Пугачовай, Лявонцьева, Уладзіміра Мулявіна і іншых.

Заўтра на "базары" сольны канцэрт Лявонцьева і майстроў мастацтваў Беларусі. У нядзелю ў амфітэатры выступіць Вячаслаў Дабрынін і "Сябры".

Жыццё ў фестывальным горадзе кіпіць. Паўсюды адкрыліся часовыя кавярні, рэстараны. Асаблівасць гэтага года ў тым, што пешаходныя вуліцы ў гістарычным цэнтры горада сталі месцам "дыслакацыі" падворкаў, на якіх прадстаўлены гандлёвыя прадпрыемствы з усіх раёнаў Віцебшчыны. Падворкі аформлены з нацыянальным каларытам. Прайсці міма цяжка.

У месцах правядзення самых розных акцый і мерапрыемстваў фестывалю міліцыянеры праводзяць асабісты агляд. Пры гэтым яны стараюцца быць вельмі карэктнымі. Асабліва буйных затораў на дарогах не назіраецца, і гэта нягледзячы на тое, што колькасць аўто ў горадзе, зразумела, павялічылася значна. Шыкоўныя лімузіны важна праязджаюць па вуліцах, часта не без цяжкасцяў на паваротах.

Віцебск акунуўся ў непаўторны "базарны" вобраз жыцця. Той, хто не быў на фестывалі, не зразумее. А каму пашчасціла, успомніць як начамі замест таго, каб спаць, людзі ходзяць на канцэрты. Потым, каму трэба, — на работу. І зноў на "базар". І здаецца што так было заўсёды, а не толькі 20 гадоў. І будзе! Абавязкова! У Віцебску!

Аляксандр ПУКШАНСКІ.