100 ідэй для Беларусі

Источник материала:

"Разумны дом", "Школа юнага праграміста", "ІT-атрад", "Зялёны дом"...

... — усяго 10 праектаў прадставяць студэнты Беларускага дзяржаўнага ўніверсітэта інфарматыкі і радыёэлектронікі на Рэспубліканскі моладзевы конкурс "100 ідэй для Беларусі".

Напрыклад, студэнт 3 курса факультэта інфармацыйных тэхналогій і кіравання Станіслаў АРХІПЕНКА прапануе на конкурс праект "Разумны дом" са створанай ім аўтаматызаванай сістэмай, якая памяншае расход энергіі ў жытле і адначасова павышае ўзровень якасці пражывання. Сістэма кіруе ацяпленнем, святлом, мае сімпатычны wеb інтэрфейс, умее сінтэзаваць мову і ўзаемадзейнічаць з сеткай GSM (адпраўляе і прымае SMS). Апроч таго, яна спалучае ў сабе відэаназіранне і серверы: мультымедыйны, імёнаў лакальнай сеткі, DHСР , DуnDNS і многае іншае. З улікам эканамічнасці, надзейнасці і ўніверсальнасці сістэмы, можна спадзявацца, што яна зацікавіць рынкі Беларусі і бліжняга замежжа.

Студэнты 5 курса факультэта камп'ютарных сістэм і сетак Аляксей МАНЮК, Аляксей ЖВІРБЛІС, Дзмітрый ШЧУРУК, Ігар ЦІМАШЭНКА заявілі на конкурс праект "Школа юнага праграміста", мэта якога — выкладанне мінскім школьнікам асноў праграмавання. Варта адзначыць, што праект ужо рэалізуецца на базе БДУІР.

У праекце "Зялёны дом" студэнткі 3 курса факультэта камп'ютарных сістэм і сетак Дар'і ДАРСКОЙ рэалізуецца ідэя стварэння валанцёрскага экалагічнага атрада. Яго ўдзельнікі ўжо высаджваюць кветкі ў Батанічным садзе Нацыянальнай акадэміі навук, а ў будучыні пракладуць там новыя сцяжынкі для прагулак, зоймуцца прыбіраннем смецця на алеях.

Студэнт 5 курса факультэта радыётэхнікі і электронікі Ігар БАРУШКА прадставіў на конкурс праект "ІT-атрад". Яго мэта — навучанне карыстальнікаў-пачаткоўцаў рознага ўзросту рабоце на камп'ютары, а таксама стварэнне wеb-сайтаў, праектаванне аналагавых і лічбавых прыстасаванняў. "ІT-атрад" ужо дзейнічае ў ВНУ.

Іна АРЭХАВА.