Класіка беларускай літаратуры знікла з брэсцкіх аўтобусаў

 

Нагадаем, што вытрымкі з твораў Янкі Купалы, Максіма Гарэцкага, Уладзіміра Караткевіча і Васіля Быкава з'явіліся напрыканцы лютага на пяці аўтобусных маршрутах. Акцыя "Чытай беларускае!" праводзілася грамадскім аб'яднаннем "Дзедзіч" у межах кампаніі "Наша мова".

Каб высветліць, ці не забароненая класіка беларускай літаратуры, кіраўнік "Дзедзіча" Зміцер Шыманскі наведаў аддзел ідэалогіі Брэсцкага гарвыканкама.

Шыманскі: "Намеснік старшыні аддзела ідэалогіі Брэсцкага гарвыканкама адказаў, што трэба перарабіць дызайн улёткі, каб яна займала менш месца. Асноўная прычына — гэта тое, што быццам бы аўтобусы, тралейбусы і так перагружаны рэкламай. На наступным тыдні мы абавязкова унясем пажаданыя змены ва ўлёткі і зноў звернемся да ідэолагаў па новае ўзгадненне".

Паводле слоў Шыманскага, у аддзеле ідэалогіі нават паабяцалі дапамагчы ў перамовах з аўтобусным і тралейбусным паркамі, каб кошт рэкламы быў меншы, чым для камерцыйных арганізацыяў.