Няхай усе радуюцца жыццю

Источник материала:

Да Дня Незалежнасці зусім юныя гамяльчане атрымалі новы дзіцячы садок на 230 месцаў. Дашкольная ўстанова адукацыі пабудавана на базе былога дома малюткі. Тут будуць працаваць 12 груп для дзяцей з мікрараёнаў новабудоўляў №№ 20, 21 і Валатавы. Дарослыя гамяльчане свята адзначалі на вуліцах горада, дзе для іх працавала шмат разнастайных пляцовак.

А пачаліся ўрачыстасці мітынгам і цырымоніяй ускладання кветак і вянкоў да брацкай магілы савецкіх воінаў і падпольшчыкаў. Воінскія фарміраванні прайшліся ўрачыстым маршам перад гамяльчанамі і гасцямі горада над Сожам. Святочнае спартыўнае шэсце моладзь прысвяціла ХХХ летнім Алімпійскім гульням. Канцэрты і кніжныя выставы, праграма дзіцячых музычных школ і школ мастацтваў, — гамяльчанам было з чаго выбраць, каб не сумаваць падчас цудоўнага сонечнага дня, які, здаецца, сёння зусім не нагадвае аб падзеях 1944 года. І толькі ветэраны ніколі не забудуць, як дасталася незалежнасць. Маёру запасу Мікалаю Аляксеевічу Жыленку — 92 гады. Артылерыст прайшоў вайну з першага да апошняга дня і быў удзельнікам парада Перамогі ў Маскве:

— У 1944 годзе наша брыгада падышла да толькі што вызваленага Мінска. 4 ліпеня мы яшчэ акружылі і ліквідавалі групоўку немцаў, якая знаходзілася пад сталіцай Беларусі.

Ганна Сяргееўна Станкевіч — падпольшчыца і партызанка. У партызанах была ўся яе сям'я:

— У 1941 годзе мне было 12 гадоў. У нас не было дзяцінства. Я разам са сваякамі была ў спецатрадзе НКУС. Дарагога варты гэты дзень незалежнасці. Для нас радзіма — самае галоўнае ў жыцці. Я вельмі рада, што сёння наша моладзь такая прыгожая і жыццярадасная. Няхай усе радуюцца жыццю ў свабоднай краіне.

На вуліцы горада над Сожам адпачыць выйшлі тысячы людзей. Гамяльчанка Таццяна Уласава гаворыць, што дагэтуль здзіўляецца энергіі ветэранаў, іх жаданню расказаць пра ўсё, што давялося прайсці:

— Дзень Незалежнасці перш за ўсё — гэта даніна павагі да тых людзей, якія прайшлі сур'ёзныя выпрабаванні ў сваім жыцці. А яшчэ — мая свабодная квітнеючая Беларусь. Мы — самастойная, прыгожая, самадастатковая дзяржава, і мне вельмі прыемна гэта адчуваць.

Рэспубліканская акцыя "Спяем гімн разам!" і феерверк завяршылі святочныя мерапрыемствы ў Гомелі.

Ірына АСТАШКЕВІЧ.