Перапынак на абед у аўтаматычнай (!) камеры захоўвання і каса для дэпутатаў

Источник материала:

Чым яшчэ здзіўляе беларуская чыгунка.

На вакзале Мінск-Пасажырскі ёсць асобная каса для дэпутатаў Нацыянальная сходу. Тут жа абслугоўваюцца інваліды. Няхай, для інвалідаў і сапраўды патрэбная асобная каса, але для дэпутатаў… Іх жа трохі больш за сотню?!

“Вы таксама можаце там купляць білеты! Проста, калі нешта экстранае, і дэпутатам трэба некуды ехаць, яны могуць падысці ў гэту касу, каб не выклікаць нараканні пасажыраў”, — папярэджваюць хвалю маіх абурэнняў у БЧ, і каб канчаткова мяне супакоіць, удакладняюць, што дэпутаты купляюць білеты… вельмі рэдка.

А як жа інакш. Паспрабуйце, падыдзіце да касы, дзе чарга чакае гадзіну, дадуць вам там і дэпутатаў, і не толькі іх. Дарэчы, у гэтую касу чарга самая маленькая звычайна.

Яшчэ адно ноу-хау. Сяброўка ўзрушаецца, што бронь праз інтэрнэт магчымая толькі за тры дні да адпраўлення цягніка, да таго ж, аплаціць квіток праз інтэрнэт можна, але забіраць яго — трэба зноў жа стаяць у рэальнай чарзе!

“У нас толькі адзін чалавек апрацоўвае інфармацыю па інтэрнэт-браніраванні! Яму патрэбны час — таму можна браніраваць толькі за тры дні. Але мы цяпер прапрацоўваем пытанне, і ў чацвёртым квартале, магчыма, можна будзе раздрукаваць квіткі і ехаць па іх!” — распавядаюць у БЧ.

“Браніраванне білетаў магчымае толькі з 12.00 да 18.00”, — чую металічны голас у слухаўцы, калі набіраю “браніраванне квіткоў праз тэлефон”.

А каб дазваніцца да “браніравання” у час, трэба мець ці жалезную настойлівасць ці асаблівы поспех. Ды і гарантыі, што да 12-й квіткі не разбяруць,— няма.

У БЧ пагаджаюцца, час і сапраўды абмежаваны, абяцаюць пашыраць — на дзве гадзіны з ранку.

Яшчэ адно — браніраваць і забіраць білеты можна толькі дзень у дзень. Раней на гэта было як мінімум колькі сутак.

На БЧ тлумачаць, што гэта толькі з ліпеня. Бо было вельмі многа нараканняў.

“На далёкія рэйсы білеты разбіралі за 10 хвілін, а ў касах людзі наракалі, што няма білетаў, — тлумачаць у пасажырскім аддзеле БЧ. — Таму мы ўвялі, што можна забраць білеты толькі ў дзень браніравання”. У БЧ заўважаюць, што сёння скаргі спыніліся.

А вось такі фокус: у камер захоўвання на вакзале Баранавічы-Палескія ёсць... абедзенны перапынак! З 13.00 да 14.00 забраць рэчы з аўтаматычнай камеры захоўвання нельга.

“Так, у нас аўтаматычныя камеры захоўвання, але на час абеду мы закрываем усе памяшканні. Чаму так? Спытайцеся ў начальства!”, — гавораць на вакзале.

У пасажырскім аддзеле Мінскага ўчастка БЧ сітуацыю назвалі ненармальнай і паабяцалі разабрацца, бо… “павінен быць нейкі выхад”.