Заслаўе: плюсы і мінусы жыцця ў прадмесці Мінска

У Заслаўе мы з жонкай пераехалі ў канцы 2009. За гэты час мы ацанілі перавагі жыцця ў горадзе-спадарожніку і не паспелі звыкнуцца з яго недахопамі. Зрэшты, і тут, маючы грошы, частку праблем можна вырашыць.




Адно з першых пытанняў, што нас хвалявала пры пераездзе на новае месца, — колькі часу будзе займаць дарога на працу.

Транспарт

Патрапіць з Заслаўя ў цэнтр Мінска можна ў сярэднім за гадзіну. Да Чыгуначнага вакзала і маршрутка, і электрычкі едуць 40 хвілін.

Дадайце час на дарогу ад жытла да вакзала ў самім Заслаўі. Праз Заслаўе на Мінск пралягае некалькі маршрутаў аўтобусаў, але ходзяць яны даўжэй і радзей, таму мы імі не карыстаемся.

Ёсць тут і гарадскія аўтобусы. Ездзяць не вельмі часта, але пустымі і яны не бываюць. Ідэальны варыянт — уласнае аўто.

Праезд у маршрутцы каштуе 8500 рублёў, у гарадской электрычцы — 3000, у "звычайнай" — 1860 рублёў. Разбежка ў цэнах у цэлым на працу маршрутак істотна не паўплывала — яны рэдка бываюць паўпустыя.







Жыллё

На сёння ў Заслаўі жыве каля 15 тыс. чалавек. Апошні час колькасць насельніцтва павялічвалася ў большай ступені за кошт далучэння да горада навакольных вёсак, у меншай — за кошт пераезду ў прыгарад мінчукоў.

На нашых вачах у новым раёне горада збудавалі тры шматкватэрныя дамы, два здалі ў эксплуатацыю.

У Заслаўі планавалі збудаваць новы жылы раён з насельніцтвам, роўным па колькасці сённяшняму. Гэта нас урэшце і падкупіла. Але планы ў чарговы раз перагледзелі на карысць малапавярховай індывідуальнай забудовы.

1-пакаёўка 1985 года каштуе $31 000 ($1013 м²), 1-пакаёўка 2010 года — $75 000 ($1705 м²).

За гэтыя грошы можна набыць 3-пакаёўку 1967 года ($890 м²) і драўляны дамок агульнай плошчай 39 м². І яшчэ застанецца $4000.

Кватэры ў новых дамах маюць дадатковыя бонусы ў выглядзе парковачнага месца і дзіцячай пляцоўкі. Пашыраная тут з’ява — двухузроўневыя кватэры. Ёсць яны ў дамах забудовы 80-х гадоў (5 пакояў агульнай плошчай 96 м², 2 санвузлы, шклопакеты, дамафон, сігналізацыя — $85 000), ёсць і ў доме 2006 (без аздаблення, шклопакеты, камп’ютарная сетка, паркоўка—да $850 за м²)

Прыватная забудова прапануе цэны ад $25 000 за летні дамок да катэджаў пад ключ з цэнамі на сотні тысяч даляраў. Так, дом у нямецкім стылі ў гістарычнай частцы горада каштуе каля 175 тыс. у.а.










Праца і вакансіі

У Заслаўі працуюць "Хенкель Баўтэхнік" — выпускае будаўнічыя сумесі Ceresit, і кампанія з канадскім капіталам "Косвік" — выпускае паркет.

"Заслаўебудіндустрыя" выпускае вырабы з бетону і жалезабетону, металаканструкцыі, а таксама аказвае будаўнічыя паслугі.

Заслаўская кампанія "Енісей" займаецца выпускам шкла і люстра.

Акрамя таго, у Заслаўі працуе невялікая ўласная мэблевая фабрыка, а таксама філія "Пінскдрэва".

Таксама ёсць птушкафабрыка, будаўнічыя прадпрыемствы.

І ўсё ж пры наяўнасці такой колькасці прамысловых аб’ектаў, па розных ацэнках каля 30% працаздольных жыхароў Заслаўя працуюць у Мінску.

Аналіз вакансій сведчыць, што на сёння самую высокааплатную працу ў Заслаўі могуць знайсці цесляры і тынкоўшчыкі —будаўнічая кампанія "АлТаРемСтрой" прапануе заробкі ад $800. Філіял "Пінскдрэва" шукае аператара дрэваапрацоўчага станка (4—5 млн руб). "Хенкель Баўтэхнік" мае патрэбу ва ўкладчыках-упакоўшчыках (ад 2,5 млн руб). Грузчыкі новага склада "Еўраопт" маюць шанцы атрымаць працу з акладам да 6 мільёнаў.

Адукацыя і медыцына

У Заслаўі ёсць 6 садкоў і 3 школы. З кантактаў з маладымі суседзямі мы даведаліся, што найлепшым у горадзе лічыцца сад-яслі №2 па адрасе зав. Дачны, 4. Як і гімназія №3 на вул. Студзянецкай, 19. У старой частцы горада месціцца дзіцячая мастацкая школа. У цэлым заслаўцы даволі пазітыўна гавораць пра мясцовыя школы і садкі, не возяць дзяцей на вучобу ў Мінск.

З медыцынай складаней. Некалькі гадоў таму Заслаўе вывелі з абласнога падпарадкавання, і цяпер горад адносіцца да Мінскага раёна. Адпаведна, мясцовая бальніца і паліклініка з’яўляюцца філіямі Мінскай раённай бальніцы. У пэўных выпадках ехаць трэба акурат да бараўлянскіх медыкаў, а гэта ці не гадзіна шляху на ўласным аўто.

Дзіцячая кансультацыя і стаматалагічная паліклініка ў Заслаўі ёсць на месцы.

Гандаль і сфера паслуг

У горадзе дзейнічае некалькі ўніверсамаў і крамаў, што належаць райспажыўсаюзу, а таксама колькі прыватных крамак. Усяго агулам больш за дзясятак.

Па свежае мяса і гародніну жыхары Заслаўя ходзяць на рынак. Тут можна набыць таксама бытавую хімію, тавары для дзяцей, а таксама вопратку і абутак айчыннай вытворчасці. Адчуваецца блізасць ждановіцкага рынка — менавіта там многія апранаюцца і абуваюцца. Цэны на заслаўскім вышэйшыя за мінскія.

Змены ў мясцовым гандлі можа прынесці гіпермаркет, які пачалі будаваць у новым раёне. На канец гэтага года запланаваная здача першай чаргі гандлёва-грамадскага цэнтра.

У горадзе працуе некалькі цырульняў і касметычных цэнтраў, а таксама трэнажорных залаў.

Жыхары Заслаўя глядзяць лічбавае тэлебачанне Zala ад "Белтэлекама" (ён жа з’яўляецца асноўным пастаўшчыком інтэрнэт-паслуг), кабельнае — мясцовай кампаніі "Алена плюс", а таксама спадарожнікавае ТБ.




Адпачынак

Гісторыка-культурны музей-запаведнік "Заслаўе" прапануе адзін з шэдэўраў беларускай архітэктуры — былы кальвінскі збор, а таксама этнаграфічны комплекс "Млын" і гарадзішча "Замэчак". У Заслаўі працуе Дзіцячы музей міфалогіі і лесу, побач з ім месціцца Музей-Дот часоў Другой сусветнай вайны.

У горадзе дзейнічае Дом культуры і некалькі бібліятэк.

Кепскія дарогі і брудная вада

Да істотных мінусаў горада аднясём жудасна ржавую ваду з-пад крана. Згодна з планамі камунальных службаў, замена камунікацый можа скончыцца ў 2015. Не хочаш чакаць — выйсце ў набыцці фільтраў.

Да апошняга часу пытанні выклікаў стан дарог, асабліва ў дварах жылых дамоў. Аднак, ад пачатку восені іх узяліся рамантаваць. З’явілася і новая разметка на цэнтральных вуліцах.

Ёсць пытанні і да агульнай чысціні вуліц. І ўсё ж пэўныя нязручнасці кампенсуюцца добрым паветрам і прыгожай прыродай.






















 Фота: Наша Ніва