У якім узросце аптымальна ствараць сям’ю?

Источник материала:

Анастасія Пасечнік, маладая маці:

– Думаю, самы лепшы перыяд – гэта 20-25 гадоў. Тады людзі і псіхалагічна лепш падрыхтаваныя да сумеснага жыцця, і пачынаюць самастойна працаваць і зарабляць грошы.

Аляксандр Нужын, пенсіянер:

– Ствараць можна ў любым, але якой атрымаецца сям’я – іншае пытанне. З уласнага досведу скажу: перад вяселлем і мужчына, і жанчына павінны дайсці да пэўнай ступені маральнага і матэрыяльнага развіцця. У першую чаргу – адказваць за свае ўчынкі і ўмець браць на сябе адказнасць.

Наталля Глебец, у дэкрэтным адпачынку:

– Для таго, каб сям’я сапраўды адбылася, маладыя павінны быць падрыхтаваныя матэрыяльна. Але псіхалагічны бок таксама важны – да ранніх шлюбаў, гадоў у 17-18, не ўсе падрыхтаваныя. Напэўна, лепш за ўсё ствараць сям’ю ў 21-22 гады.

Аляксандр Гарэлікаў, рабочы:

– Мужчына можа жаніцца тады, калі адчуе, што можа ўтрымліваць уласную сям’ю. Бо маладыя хлопцы часта не разумеюць функцый мужчыны. А жанчына – калі зразумее мэту, з якой хоча выходзіць замуж. Для таго, каб сям’я была моцнай, важна, каб маладыя аддзялялі такія паняцці, як закаханасць і каханне.

Іван Бычкоўскі, аператар:

– Для кожнага ўзрост свой. Адзінае, на што варта звярнуць увагу, – каб маладая сям’я была самастойнай і не залежала ад бацькоў, не была ў іх на ўтрыманні.

Ягор Жыхараў, менеджар:

– З пункту гледжання падрыхтаванасці арганізма лепшы ўзрост – 21 год. Да гэтага ўзросту можна паспець падрыхтавацца да сямейнага жыцця да таго ж і маральна, і матэрыяльна.

Пётр Канановіч, інжынер:

– Для мужчыны лепшы ўзрост – 27 гадоў. Тады ён будзе пасля арміі, будзе больш сталым і на ўсё стане глядзець інакш. А для жанчыны – 22, калі яна толькі скончыць вучобу.

Настасся РОЎДА,
Аляксандра ПАРАХНЯ.

Фота thomsenhomesllc.com