Міліцыянтам забаранілі курыць у форме і ў будынках міліцыі

Источник материала:

Дакумент мае назву "Аб папулярызацыі здаровага ладу жыцця сярод супрацоўнікаў і грамадзянскага персаналу органаў унутраных справаў Рэспублікі Беларусь, вайскоўцаў і грамадзянскага персаналу ўнутраных войскаў Міністэрства ўнутраных справаў Рэспублікі Беларусь".

Ён акрэслівае меры па барацьбе са шкоднымі звычкамі сярод праваахоўнікаў.

"Ні цыгарэта, ні, тым больш, алкаголь несумяшчальныя са званнем супрацоўніка міліцыі і ваеннаслужачага Унутраных войскаў! Меры па барацьбе з гэтымі негатыўнымі з’явамі прадпрымаліся кіраўніцтвам МУС і раней — у форме розных комплексаў практычных і арганізацыйных мер. Новы загад таксама змяшчае нямала такіх, праўда, у адрозненне ад ранейшых яны гранічна канкрэтызаваны", — гаворыцца ў паведамленні прэс-службы міністэрства.

Цяпер адміністратыўныя будынкі АУС, злучэнняў і вайсковых частак унутраных войскаў і прылеглыя да іх тэрыторыі абвешчаныя зонамі, вольнымі ад палення. Спецыяльна абсталяваныя для курцоў месцы рэкамендуецца размяшчаць на максімальна магчымым аддаленні ад іх.

Міліцыянтам і вайскоўцам, якія падпарадкоўваюцца МУС, забаронена курыць у форме. Парушальнікаў будуць прыцягваць да дысцыплінарнай ці адміністратыўнай адказнасці.

Меркаванні адносна новай пастановы разыходзяцца, у тым ліку і сярод саміх міліцыянтаў. Адны лічаць, што крок правільны: сілавікі павінны быць узорам здаровага ладу жыцця, а курэнне абніжае фізічныя здольнасці байца. Другія ўважаюць, што такі загад парушае правы міліцыянта як грамадзяніна.

Бо ж забарона курыць у форме і на працы азначае, што чалавека змушаюць кінуць паліць нават проці ягонай волі. Для курэння проста не застаецца магчымасці. Не можа ж курэц пераапранацца для перакуру.

А як мяркуеце Вы? Выказвайцеся ў каментах да гэтага артыкула.

Сяргей ГЕЗГАЛА.

Фота legalizeclub.org