Недахоп прыбіральшчыкаў − слабае месца Маладзечна

Источник материала:

Пакуль адны чакаюць, калі праблему з прыбіраннем пад’ездаў вырашыць жыллёва-камунальная ўстанова, іншыя сочаць за чысцінёй самі.

Прыбіральшчыкаў у домакіраўніцтвах горада не хапае, таму камунальнікі вітаюць ініцыятывы жыхароў з дзяжурствамі.

З тым, хто павінен прыбіраць пад’езды і двары шматпавярховак, дапамагла разабрацца начальніца жыллёвага аддзела “Камунальніка” Вольга Шыцік:

− Прыбіраць пад’езды павінны прыбіральшчыкі з домакіраўніцтва, да якога адносіцца дом. На жаль, прыбіральшчыкаў у нас не хапае, гэта наша слабае месца. Таму мы толькі вітаем, калі самі жыхары складаюць графік дзяжурстваў і самі даглядаюць пад’езд. Яны могуць гэта рабіць, але не абавязаныя.

Дворнікі і прыбі­раль­шчыкі  − розныя пасады з рознай сферай адказнасці. Калі дворнік адказвае за чысціню каля дамоў, то прыбі­раль­шчык − у пад’ездах. Цяпер дворнікам спрабуюць дадаць і абавязкі прыбіральшчыкаў.

Часам людзі проста не ведаюць, куды звяртацца з пэўнымі пытаннямі. Многія можа вырашыць ЖКГ. Калі вам трэба, напрыклад, зашкліць вокны ў падвале ці знішчыць мышэй ці прусакоў − можаце звяртацца ў домакіраўніцтва.

Яшчэ пытанне – куды выкідаць буйныя прадметы, напрыклад, канапу, халадзільнік.  З гэтым пытаннем можна звярнуцца ў камунальны аддзел “Камунальніка”

па тэлефоне 8 (0176) 73-19-17.

Распрацаваны спецыяльны рэгламент, які рэгулюе прыбіранне. Мы прыводзім некаторыя пункты ніжэй.

Правілы прыбірання

Наступныя правілы тэхнічнага абслугоўвання, распрацаваныя ў пастанове Міністэрства жыллёва-камунальнай гаспадаркі ад 20 мая 2013 года.

Санітарныя работы ў дапаможных памяшканнях дамоў (пад’езды)

1	Мыць вокны	Раз на год, вясной
2	Рабіць сухую ўборку ад смецця	Не менш за два разы на тыдзень
3	Мыць лесвічную пляцоўку без абсталявання (звычайнай анучай)	Два разы на месяц
4	Мыць лесвічную пляцоўку з ліфтам	Два разы на месяц
5	Мыць лесвічную пляцоўку з ліфтам і смеццеправодам	Два разы на месяц
6	Прыбіраць кабіны ліфтаў	Раз на пяць дзён
7	Абмятаць пыл са столі, праціраць сцены вільготным спосабам, а таксама дзверы, плафоны, ацяпляльныя прыборы	Раз на год
8	Прыбіраць падвалы, тэхнічныя падполлі, гарышчы, тэхнічныя паверхі, тэхнічныя памяшканні і памяшканні спецыяльнага прызначэння	Два разы на год
9	Дэзінсекцыя (знішчэнне насякомых)	Па меры неабходнасці, адпаведна з заяўкамі
10	Дэратызацыя (знішчэнне грызуноў)	Па меры неабходнасці, адпаведна з заяўкамі

Асноўныя віды работ па прыбіранні каля дамоў вясной, летам і восенню

1	Падмятаць свежавыпаўшы снег таўшчынёй слою да 2 см	Не радзей аднаго разу на суткі
2	Чысціць прыдамавую тэрыторыю ад шчыльнага снегу таўшчынёй да 2 см	Не радзей аднаго разу на суткі
3	Чысціць прыдамавую тэрыторыю ад наледзі і снегу	Адзін раз на суткі
4	Чысціць прыдамавую тэрыторыю ад наледзі і снегу	Пры механізаванай уборцы
5	Прывезці і пасыпаць прыдамавую тэрыторыю пяском ці пясчана-солевай сумессю	Па меры неабходнасці
6	Прыбіраць пляцоўку смеццевых кантэйнераў	Раз на суткі
7	Прыбіраць газоны ад выпадковага смецця	Раз на тыдзень

Асноўныя віды работ па прыбіранні каля дамоў зімой

1	Падмятаць прыдамавую тэрыторыю з пакрыццём	Раз на два дні
2	Падмятаць прыдамавую тэрыторыю без пакрыцця	Раз на тры дні
3	Прыбіраць пляцоўку смеццевага кантэйнера	Раз на суткі
4	Прыбіраць газоны ад лісця, галінак, смецця	Раз на два дні летам і восенню
5	Касіць газон ад мая па верасень	Не радзей аднаго разу на месяц
6	Чысціць участак пры механізаванай уборцы	Раз на два дні
7	Чысціць урны ад смецця	Раз на дзень

Зоя ХРУЦКАЯ.

Фота krasguk.ru.