Гісторыка Святлану Куль-Сяльверставу звальняюць з гродзенскага ўніверсітэту

Источник материала:

Доктару гістарычных навук Святлане Куль-Сяльверставай не працягнулі кантракт у Гродзенскім універсітэце з-за "малой публікатарскай дзейнасці". Што праўда, за апошнія пяць год выходзіць ужо чацвёртая ейная кніга.

Папярэдні кантракт спадарыні Куль-Сяльверставай сканчаецца 29 снежня. Як афіцыйную прычыну яе звальнення называюць няпоўную адпаведнасць пасадзе, падставай для якой стала малая публікатарская дзейнасць. У мінулым годзе гісторык працавала на паўтары стаўкі. У гэтым свядома пайшла на 0,25, бо ведала, што яе звольняць.

"Кажуць, не адпавядаю. Гэта радуе. Цяпер адпавядаць універсітэту ў Гродне – гэта сорам. Там быў такі дурдом і гулаг, што нармальнаму чалавеку не вытрымаць. Выкладчыкі былі як рабы ў адміністрацыі, дзікая бюракратыя і непавага да навукі. Гэта адбывалася менавіта апошнія два гады, як пайшоў Ярмусік з дэканства, стала зусім невыносна. За працу ў гэтым універсітэце не трымалася – гэта ўжо не мой універсітэт. Тое, што стваралася 35 гадоў, знішчылі за тры гады", – Святлана Куль-Сяльверстава кажа пра сваё звальненне з палёгкаю.

Яна чытала ўнікальны для Беларусі курс беларускага скорапісу і беларускай гістарычнай храналогіі. У апошнія месяцы кансультавала калегу, каб перадаць яму свае веды. Мяркуе, што перадала.

Спадарыня Святлана ўжо шэсць год працуе ў Беластоку на факультэце кіравання Палітэхнічнай Акадэміі. Яна па-польску выкладае гісторыю архітэктуры і мастацтва, гісторыю культуры, два невялікіх курсы, звязаныя з эканомікай турызму, кіруе магістрантамі, вядзе магістарскі семінар. Запэўнівае, што заробку ёй хапае на жыццё. Гаворыць, галоўнае, каб хапіла на кнігі паэзіі, якія яна друкуе за свае сродкі.

"Цяпер нарэшце свабода! Я цяпер зноў пачну пісаць вершы. Яны заўсёды са мной. Увесну выйдзе новая кніга паэзіі", – не крые спадзяванняў гісторык.

Нядаўна выкладчыца аддала ў друк манаграфію "Беларускі час. Летазлічэнне ў Беларусі са старажытнасці да сучаснасці". Гэта першая кніга па гістарычнай храналогіі ў беларускай гістарыяграфіі. Навуковец цікавіцца тэмай часу. Наступная кніга, над якой яна працуе разам з калегам Андрэем Кіштымавым, датычыцца гадзіннікаў ды гадзінаў.

Сёлета спадарыня Святлана дасягнула пенсійнага ўзросту, але спадзяецца дапрацаваць у Беластоку да "польскай пенсіі". У перспектыве плануе заняцца вывучэннем гістарычнай метралогіі.

У хвалю звальненняў раней трапілі многія іншыя выкладчыкі гродзенскага ўніверсітэту, сярод якіх Іна Соркіна, Вячаслаў Швед, Андрэй Чарнякевіч, Ігар Кузьмініч, Вольга Сабалеўская.