Другі раз завітала на глускую зямлю рэспубліканская народна-патрыятычная акцыя Федэрацыі прафсаюзаў Беларусі “Мы — разам!”. У яе рамках на цэнтральным стадыёне Глуска прайшоў прыгожы святочны канцэрт, дзе разам з вядомымі беларускімі артыстамі Вольгай Плотнікавай, Сашам Нэма, групай “Навібэнд” выступілі фіналісты і пераможцы творчага прафсаюзнага конкурсу “Новыя імёны Беларусі” — прадстаўнікі розных рэгіёнаў краіны, розных прафесій, але аднолькава таленавітыя і ўлюбёныя ў мастацтва. Сяголета акцыя мае не толькі культурную, але і сацыяльную накіраванасць: яна праходзіць пад дэвізам “З вялікай любоўю да малой радзімы!”.
З нашай малой радзімай, Глушчынай, прыехаўшыя артысты змаглі пазнаёміцца падчас невялікай экскурсіі, якую для іх па цэнтры мястэчка правяла наша калега, журналіст і гісторык Вольга Янушэўская. Потым творчы дэсант накіраваўся ў самы густанаселены мікрараён Глуска, “сем вятроў”, каб зрабіць свой невялікі ўнёсак у яго развіццё, пакінуць аб сабе прыгожы след: у дзіцячым садку № 4 артысты пафарбавалі новыя столік і альтанку, зробленыя бацькамі яго выхаванцаў. Гэта дзея важная не сама па сабе, а як прыклад таго, што кожны можа і павінен зрабіць нешта патрэбнае іншым, і калі ўсе нашы маленькія добрыя справы аб’яднаць разам, то ўбачым, што насамрэч святлей і прыгажэй стане навокал.
Вітаючы падчас урачыстасці артыстаў і глушчан, удзельнікаў акцыі “Мы — разам!”, старшыня раённага аб’яднання прафсаюзаў Аляксандр Леўчанка нагадаў, што ўсім нам патрэбна помніць пра свае карані, любіць сваю зямлю, жыць і працаваць так, каб яна прыгажэла, каб сюды вярталася моладзь і прадаўжала традыцыі сваіх бацькоў і дзядоў. І вельмі добра, што ў Глускім раёне ёсць такія прыклады, ёсць свае працоўныя дынастыі. Іх ушанаванне было адным з найбольш цікавых момантаў свята. Гэта дынастыя сям’і Тараховіч-Атлас, што працуюць у Глускім лясгасе, яе пачынальнік Іван Вікенцевіч Тараховіч 20 гадоў адпрацаваў у лясгасе, зараз тут працуюць яго дачка Алена Іванаўна, зяць Сяргей Леанідавіч Атлас, унучка Вольга і яе муж Мікалай Парахаўнік, іх агульны стаж работы ў лясной гаспадарцы больш за 60 гадоў. Дынастыя Лушчык з аграфірмы “Слаўгарадскі” сельскай гаспадарцы прысвяціла больш за 50 гадоў, у аграфірме працуюць Ніна Аляксандраўна, яе дачка Марыя Іванаўна і ўнук Віталь. Восем педагогаў складаюць самую вялікую працоўную дынастыю раёна — Сыцька-Бабовіч, яе пачынальнікамі з’яўляюцца Іван Андрэевіч Верамейчык і Лідзія Іванаўна Пшанічная, потым былі Пімен Іванавіч Пшанічны, Галіна Іванаўна Слук, цяпер працуюць Валянціна Іванаўна Сыцька, Ірына Аляксандраўна Пятровіч, Таццяна Іванаўна і Валерый Васілевіч Бабовіч. Агульны працоўны стаж гэтай дынастыі складае 278 гадоў. Звязаныя сваяцкімі сувязямі, усе гэтыя людзі стараюцца годна жыць і працаваць, працягваць лепшыя традыцыі і быць адданымі справе, якую пачалі іх продкі. Дзякуй вялікі ім за гэта, гонар і пашана. А на канцэрце яны прымалі кветкі, падарункі і шчырыя апладысменты землякоў. Таксама Аляксандр Леўчанка ўручыў падзякі прэзідыума савета Федэрацыі прафсаюзаў намесніку старшыні райвыканкама Дзмітрыю Цімчанку — за вялікі асабісты ўклад у развіццё сацыяльнага партнёрства, выкананне службовых абавязкаў у інтарэсах членаў прафсаюза; намесніку дырэктара па механізацыі ААТ “Зара Камуны” Юрыю Алёхну — за актыўную працу ў прафсаюзнай арганізацыі па абароне сацыяльна-працоўных правоў і інтарэсаў членаў прафсаюза; старшыні пярвічнай прафсаюзнай арганізацыі ААТ “Глускае райаграпрамтэхзабеспячэнне” Уладзіміру Аскераву і старшыні пярвічнай прафсаюзнай арганізацыі Аўтапарка № 15 Людміле Ліпскай — за шматгадовую плённую працу ў прафсаюзнай арганізацыі па ахове сацыяльна-працоўных правоў і інтарэсаў членаў прафсаюза.
Не засталіся без падарункаў і іншыя ўдзельнікі прафсаюзнай акцыі: гледачы канцэрта з задавальненнем слухалі і падпявалі спевакам, танцорам, музыкам, а тыя, хто найбольш актыўна падтрымліваў выканаўцаў, атрымаў ад іх сімвал акцыі — птушку шчасця, бусліка. Што сказаць пра канцэрт: таленавітыя артысты, прыгожыя галасы, цудоўныя нумары, неймаверна пазітыўная энергія. Часам уседзець на месцы было проста немагчыма, і дзеці не сядзелі, смела пайшлі танчыць, ды так добра і дружна, быццам рэпеціравалі разам з артыстамі.
Калі канцэрт завяршыўся, а апладысменты яшчэ не сціхлі, намеснік старшыні райвыканкама Дзмітрый Цімчанка ад імя выканаўчай улады і ўсіх глушчан падзякаваў Федэрацыі прафсаюзаў Беларусі і ўсім прыехаўшым у Глуск артыстам за тое свята, якое яны падарылі яго жыхарам. Адзначыў, што гэта сустрэча праходзіць у гістарычным цэнтры Глуска, на месцы, дзе некалі стаяў вялікі пяцібастыённы замак, і падарыў на памяць кнігу гісторыка Ірыны Ганецкай “Глускі замак” . Гэта праца стала вынікам раскопаў на гэтым замчышчы, якія праводзіла навуковец на працягу 13 археалагічных сезонаў. Яшчэ адзін падарунак — вясёлае прыгожае кацяня — быў зроблены рукамі глускіх дзяцей. За імі — будучае, і такіх раённых цэнтраў, як наш Глуск, і ўсёй нашай Беларусі.
Другі раз завітала на глускую зямлю рэспубліканская народна-патрыятычная акцыя Федэрацыі прафсаюзаў Беларусі “Мы — разам!”. У яе рамках на цэнтральным...
Главная
Гороскопы
