У Кіраўску прайшоў парад Дзедаў Марозаў і Снягурак

Штогод традыцыйна ля галоўнай ёлкі раёна, на плошчы імя Кірава, даецца старт святочнаму навагодняму марафону. Вось і напярэдадні сёлетніх навагодніх і калядных святаў ля ўпрыгожанай ёлкі сабраліся дарослыя і дзеці, каб прыняць удзел у гэтым мерапрыемстве, убачыць маляўнічы раённы парад Дзедаў Марозаў і Снягурак, сімвалізуючы надыход Новага года.
Тут галоўны Дзед Мароз здаў рапарт кіраўніку раёна Аляксандру Бутараву аб гатоўнасці да пачатку навагодніх мерапрыемстваў. Старшыня райвыканкама павіншаваў прысутных і даў старт святочнаму марафону.
Дзятва разам з прадстаўнікамі раённай улады, казачнымі персанажамі і ўсімі жадаючымі вадзіла карагоды каля ёлкі, удзельнічала ў зімовых забавах. А затым калона Дзедаў Марозаў і Снягурак пад музыку духавога аркестра “Фанфары Кіраўска” рушыла па вуліцах райцэнтра, адорваючы прахожых усмешкамі.
У навагодніх персанажаў пераўвасобіліся прадстаўнікі арганізацый, устаноў: аддзела кінавідэамерапрыемстваў цэнтралізаванай клубнай сістэмы раёна, СШ №1 і СШ №2 імя К.П.Арлоўскага горада, Мышкавіцкай СШ, Жыліцкага дзяржаўнага сельгаскаледжа, дзіцячай школы мастацтваў г.Кіраўска, РЦСАН, аддзела прымусовага выкананння, райспажыўтаварыства, ЦРБ, ААТ “ПМК-97 “Вадбуд”, ПМК-255, філіяла “Аўтапарк №14”, РАНС, ЦБП №709 ААТ “ААБ Беларусбанк”, Баравіцкага, Барчыцкага, Мышкавіцкага, Дабаснянскага, Барсукоўскага, Паўлавіцкага сельскіх Дамоў культуры, раённай бібліятэкі, ААТ “Кіраўскае райаграпрамтэхзабеспячэнне”.