Абнаўленне стадыёна ў Глуску пачалося ў ліпені

Источник материала:

У апошні час многія жыхары і госці райцэнтра з непрытоенай цікавасцю сочаць за зменамі, якія закранулі глускі цэнтральны стадыён — месца, дзе ладзяцца спаборніцтвы і святы, куды прыходзяць за здароўем і добрым настроем людзі самых розных узростаў. Абнаўленне спартыўнага аб’екта пачалося ў ліпені. З пачатку месяца рамонтныя работы актыўна разгарнуліся на адкрытай пляцоўцы стадыёна. Яе рэканструкцыя праводзіцца ўласнымі сіламі, паясніў намеснік начальніка аддзела па адукацыі, спорце і турызме Глускага райвыканкама Ігар Сушчэня. Рабочая брыгада з ліку супрацоўнікаў фізкультурна-спартыўнага клуба і дзіцяча-юнацкай спартыўнай школы цалкам замяніла агароджу на пляцоўцы, засталося ўстанавіць новыя сядзенні для балельшчыкаў і запасных гульцоў, прывесці ў належны стан пакрыццё, пафарбаваць гімнастычны гарадок за пляцоўкай.

З кожным днём новае аблічча набывае і будынак дзіцяча-юнацкай спартыўнай школы. Зараз будаўнікі з Бабруйска тынкуюць і шпаклююць сцены, пасля пафарбуюць фасад. На жаль, працу часта перапыняюць дажджы, адзначыў Ігар Сушчэня, але запланаваныя рамонтныя работы будаўнічая брыгада абяцае выканаць да сярэдзіны жніўня. Дарэчы, будынак абнаўляецца не толькі вонкава, пра яго выгляд унутры ўжо паклапаціліся работнікі ДЮСШ. Яны пафарбавалі сцены і падлогу ў спартыўнай зале, правялі рамонт кабінетаў і калідора. Пэўны фронт работ плануюць выканаць і на самім стадыёне: на бегавой дарожцы пакладуць сучаснае бясшвовае рызінавае пакрыццё даўжынёй 100 метраў, больш прывабны выгляд набудуць і трыбуны для гледачоў, сядзенні падзеляць на сектары і пафарбуюць у розныя колеры, падрамантуюць праходы паміж радамі.

“Сёння развіццю спорту ў раёне надаецца немалая ўвага, — падкрэсліў Ігар Сушчэня. — Бясспрэчна, што ўсе рамонтна-абнаўленчыя работы на цэнтральным стадыёне, на якія ідуць сродкі з раённага і абласнога бюджэтаў, праводзяцца на карысць глушчан, для таго, каб колькасць аматараў здаровага і актыўнага ладу жыцця павялічвалася, каб яны маглі займацца спортам у дастойных умовах”.

Г. АЎТУХОВА

Фота аўтара