Зэр гут, Антон!

Источник материала:

Галоўны трэнер беларускай футбольнай зборнай Бернд Штанге адзначае прагрэс у вывучэнні нямецкай мовы паўабаронцы Антона Пуцілы, які нядаўна перайшоў з мінскага «Дынама» ў клуб бундэслігі «Фрайбург», а некалькі гадоў таму гуляў у «Гамбургу».

Штанге і Пуціла 5 кастрычніка ўзялі ўдзел у прэс-канферэнцыі ў Мінску, прысвечанай падрыхтоўцы да матчу адборачнага турніру чэмпіянату Еўропы-2012 Люксембург — Беларусь (8 кастрычніка).

«Пакуль мы ехалі сюды, размаўлялі па-нямецку, і я ўсё зразумеў», — сказаў Штанге.

Паводле слоў футбаліста, ён два разы на тыдзень займаецца з рэпетытарам, які, праўда, не ведае рускай мовы.

Гулец не бачыць праблемы ў тым, што сезон для яго далёкі да завяршэння, хоць пачаўся яшчэ ў сакавіку, а для яго цяперашняй каманды — у жніўні. «Я яшчэ малады», — адзначыў 23-гадовы футбаліст.

У сваю чаргу Бернд Штанге правёў частку прэс-канферэнцыі на рускай мове.

«У мяне ёсць добрая настаўніца. Вельмі важна, што праз тры гады працы тут я магу размаўляць па-руску. Я гэта раблю ў федэрацыі, у зносінах з гульцамі, у горадзе», — сказаў трэнер.

Раней Штанге заяўляў, што не асмельваецца размаўляць з журналістамі па-руску, бо баіцца штосьці няправільна сказаць ці зразумець, аднак апошнім часам усё ж стаў пераходзіць на рускую.

Нямецкі спецыяліст таксама паведаміў, што не змог трапіць на прыём у пасольства Германіі з нагоды 20-годдзя германскага адзінства, бо «быў у дарозе». «Футбол з раніцы да вечара», — сказаў Штанге, адзначыўшы, што Дзень германскага адзінства — цудоўнае свята для немцаў і ўсёй Еўропы.