Алкмаар, кашмар...

Источник материала:

Няма сумненняў, што ў пошуках рыфмы многія беларускія футбольныя балельшчыкі зайшлі нашмат далей з мэтай больш грунтоўна "прайсціся" па фінішнай прамой чэмпіёна Беларусі — барысаўскага БАТЭ — у розыгрышы Лігі Еўропы. Апошні выязны матч плэй-оф супраць галандскага "Алкмаара" падначаленыя Віктара Ганчарэнкі прайгралі 0:3. З улікам нядаўняга дамашняга паражэння (1:4) кіеўскімі дынамаўцамі можна зрабіць выснову, што футбалісты БАТЭ ці то чымсьці прагнявілі ўдачу, якая спрыяла ім на працягу сезона, ці, можа, проста страцілі галявое пачуццё з-за адсутнасці матывацыі ў канцы года.

Зрэшты, пытанняў па выніках апошняга матча ў Алкмаары застаецца шмат. Хоць адказы на іх можна было спрагназаваць пасля заканчэння паядынку на падставе кароткага выступлення настаўніка барысаўчан Віктара Ганчарэнкі. "Мы трапілі ў такую сітуацыю, — зазначыў ён на прэс-канферэнцыі, — калі любыя нашы словы могуць быць расцэнены як апраўданне. А па вялікім рахунку нам апраўдвацца няма чаго. Вельмі ўжо цяжкім аказаўся гэты сезон. У канцы яго нам проста не хапіла сіл", — заключыў Віктар Міхайлавіч.

Сказаць, што каманда збіралася дагуляць сезон 2010 года ў паўсілы — значыць зманіць. І пацвярджэннем сур'ёзных намераў беларускага чэмпіёна заняць першае месца ў групе, можна лічыць больш чым тыднёвы збор у наваколлі італьянскай сталіцы і пражыванне не ў суседнім Амстэрдаме, сталіцы Нідэрландаў, а ў гарадской цішыні правінцыйнага гарадка Алкмаара. Зараз цяжка сказаць, наколькі станоўча адбіліся на стане каманды "рымскія канікулы", аднак тое, што каманда нават пры даволі невыразнай заключнай гульні мела шанцы як мінімум звесці матч ў нічыю і завяршыць сезон на мажорнай ноце, — факт. Калі б не адмена гола румынскім арбітрам Аляксандру Д'якону і пры ўмове, што супернікі далі б нашым магчымасць згуляць так, як мы прывыклі бачыць беларускага чэмпіёна — актыўна, упэўнена, з надзейнай абаронай. Праўда, у футболе, як і ў спорце, умоўны лад непрымальны, тым больш, што ў абсалютнай большасці гульцоў "Алкмаара" у галаве засталіся словы настаўніка Герцьяна Вербеека пасля пройгрышу 1:4 у Мінску. Тады галандскі коўч у якасці апраўдання сказаў журналістам, што ў снежні вы ўбачыце зусім іншую каманду, якая будзе на галаву вышэй па майстэрстве і заб'е столькі, колькі спатрэбіцца.

Відавочна, што слоў на вецер спадар Вербеек не прывык кідаць. Хоць будзем шчырымі. Гэтая перамога спатрэбілася "Алкмаару" і дзеля ўласнага прэстыжу ў сур'ёзным еўрапейскім турніры, і для таго, каб рэабілітавацца ў вачах шматлікіх гледачоў.

Супернік нашай каманды вызначыцца сёння падчас жараб'ёўкі.