Вяртанне Пракопа

Мінулай восенню, калі легендзе беларускага футбола Аляксандру Пракапенку споўнілася 60 гадоў, упершыню прагучала прапанова аб увекавечанні яго памяці ў назве аднаго са спартыўных аб’ектаў Бабруйска.

Ідэю адобрылі чытачы некалькіх мясцовых і цэнтральных выданняў, канкрэтызаваўшы: імя А. Пракапенкі трэба прысвоіць новаму футбольнаму стадыёну ў Бабруйску. Сёння, калі будаўніцтва гэтага аб’екта са штучным пакрыццём падыходзіць да фінішу, сваю папраўку ўнёс новы кіраўнік ФК «Белшына» Міхаіл Бандарэнка, які лічыць, што імем земляка трэба назваць стадыён «Спартак», на якім ён пачынаў шлях у вялікі футбол. Такім чынам увекавечана імя Эдуарда Стральцова ў Маскве, Валерыя Лабаноўскага — у Кіеве. Так будзе ці інакш — паглядзім, важна, што памяць аб Пракопе жыве сёння ў турніры яго імя ў Бабруйску, ва ўспамінах яго балельшчыкаў.