«Нежачкіны» песні

На «Дажынках» у Маладзечне намеснік прэм’ер-міністра Беларусі Валерый Іваноў падзякаваў усім, хто спрычыніўся да арганізацыі фэсту, у тым ліку і творчым калектывам.

Сярод артыстаў, што выступалі на галоўнай сцэне «Дажынак-2011», быў і дзіцячы фальклорны ансамбль з Расон «Нежачкі» (на фота), якім кіруе Валянціна Літвінава. Удзельнікі калектыву разам з педагогамі збіраюць у творчых экспедыцыях песні і танцы свайго рэгіёна, каб даць ім новае жыццё. Апроч герояў жніва з усёй краіны, расонскія песні і танцы пачулі і пабачылі выхаванцы дома-інтерната ў Радашковічах. Канцэрт запомніўся і гледачам, і артыстам. Равеснікі запісвалі выступленне ансамбля на сотавыя тэлефоны і абяцалі выкласці відэа і аўдыё ў інтэрнет, каб папулярызаваць народную творчасць. Так што, магчыма, рынгтоны (мелодыі для тэлефонаў) ад «Нежачкаў» хутка будуць не менш запатрабаваныя за сучасныя кампазіцыі.

Сяргей Кавалеўскі, фота аўтара, «НС».