Свята ў гонар глушчанак

Источник материала:

Шчырыя віншаванні, цёплыя словы ўдзячнасці і лепшыя пажаданні напярэдадні 8 Сакавіка прымалі самыя родныя і любімыя, клапатлівыя і спагадлівыя, адказныя і настойлівыя, тыя, з каго пачынаецца ўсё ў жыцці і хто ўносіць у яго радасць, хто паспяхова сумяшчае мацярынства з працай, не шкадуючы сябе ў бясконцых жыццёвых клопатах. Гэта ў іх гонар і для іх, прадстаўніц прыгожай паловы чалавецтва самых розных узростаў і прафесій, у Глуску адбыўся святочны канцэрт-віншаванне “З любоўю да жанчыны”.

З самым цудоўным вясеннім святам жанчын павіншаваў старшыня Глускага райвыканкама Сцяпан Чачуха. Ён сказаў пра неацэнную ролю жанчыны ў розных сферах жыццядзейнасці, але падкрэсліў, што галоўнае жаночае прызначэнне — быць захавальніцай сямейнага ачага, пажадаў усім цудоўнага настрою, моцнага здароўя, шчасця і дабрабыту. Віншаванні са святочна ўпрыгожанай сцэны кінатэатра “Арыён” у адрас жанчын прагучалі і з вуснаў намесніка старшыні райвыканкама Дзмітрыя Цімчанкі. “Дзякуй вам за вашу працавітасць і падтрымку, разуменне і мудрасць, за тое, што робіце свет больш прывабным і высакародным”, — адзначыў ён.

За шматгадовую добрасумленную працу, прафесіяналізм і ў сувязі з Міжнародным жаночым днём Падзячныя лісты старшыні райвыканкама на свяце атрымалі фельчар брыгады хуткай медыцынскай дапамогі раённай бальніцы Наталля Жынько, галоўны эканаміст ААТ “Аграфірма “Слаўгарадскі” Раіса Коўганава, загадчыца касцюмернай раённага Дома культуры Зінаіда Марціновіч, сакратар прыёмнай Глускага лясгаса Святлана Нікітка, кіраўнік спраў Калаціцкага сельвыканкама Ірына Хацяновіч, прыёмшчыца комплексна-прыёмнага пункта аграгарадка Засценак Усцярхі ААТ “Глускія Бытпаслугі” Наталля Шчорс і намеснік старшыні праўлення Глускага райпо Ганна Янушэўская.

Свята прадоўжылася канцэртнай праграмай: свае лепшыя нумары віноўніцам урачыстасці дарылі дарослыя і маленькія артысты раёна. Ад добрай музыкі, яркіх фарбаў букетаў, шчырых апладысментаў гледачоў, бляску ў вачах і светлых усмешак жанчын у зале стала па-веснавому цёпла, маляўніча і асабліва ўтульна.

Г. АЎТУХОВА

Фота аўтара

Больш фота глядзіце  тут