Дэпутаты вывучалi ахову гранiцы

Источник материала:

У Брэст прыехала амаль 90 дэпутатаў на чале са старшынёй Палаты прадстаўнiкоў Уладзiмiрам Канаплёвым. Асноўны даклад зрабiў старшыня Дзяржаўнага камiтэта пагранiчных войскаў РБ генерал-лейтэнант Аляксандр Паўлоўскi. Яскравым сведчаннем няпростых пагранiчных будняў прагучалi, напрыклад, такiя лiчбы з даклада: «Сёння (25 кастрычнiка. — С. Я.) на гранiцы затрымана пяць парушальнiкаў: двое грамадзян Польшчы хацелi незаконным чынам перасячы беларуска-польскую мяжу, i трое грамадзян Грузii парушылi закон на лiтоўскiм напрамку». Таму i заступаюць на ахову дзяржаўных iнтарэсаў уздоўж гранiц 1600 нарадаў ваеннаслужачых кожныя суткi. Падчас абмеркавання даклада гаварылася пра адкрыццё i дзейнасць спрошчаных пагранiчных пераходаў для насельнiцтва памежных зон. Кiраўнiк пагранiчнага ведамства расказаў дэпутатам, што на гэты конт дасягнута станоўчая дамоўленасць з Бруселем. Як вядома, заканадаўства Еўрасаюза не дазваляла мець Польшчы i краiнам Балтыi такiя формы перасячэння мяжы. Але паступова пазiцыя еўрапейскiх краiн мяняецца. Зайшла гаворка i пра эфектыўнае выкарыстанне Аўгустоўскага канала. Аляксандр Паўлоўскi далажыў дэпутатам, што сiстэма аховы гранiц ужо перабудавана з тым, каб прымаць як мага большую колькасць турыстаў.