Крэдыты пад набыццё жылля выдаюцца, калi няма магчымасцi будавацца

Источник материала:

А. П. ЯНУШЭВIЧ, г. Слонiм.

На жаль, на гэты лiст рэдакцыя можа даць адказ толькi ў агульных рысах, паколькi заяўнiкi практычна нiчога пра сябе не паведамiлi: нi калi ў iх нарадзiлася трэцяе дзiця, нi дату пастаноўкi на ўлiк як маючых патрэбу ў паляпшэннi жыллёвых умоў, нi ўстанову, куды яны звярталiся са сваёй праблемай. Таму давялося звяртацца па каментарыi i ў Слонiмскi райвыканкам, i ў фiлiял № 422 ААБ «Беларусбанка» г. Слонiма.

Як зазначыла начальнiк аддзела крэдытавання фiлiяла № 422 Галiна Садоўская, iльготныя крэдыты мнагадзетным сем’ям пад набыццё жылля выдаюцца. Прынамсi, з восенi мiнулага года такiя крэдыты атрымалi некалькi сем’яў, праўда, у якiх выхоўваецца па 5—7 дзетак. Сказаць нешта больш дакладнае адносна сям’i заяўнiкаў цяжка па прычыне, як было ўжо сказана вышэй, адсутнасцi канкрэтных звестак.

Як дадала загадчык сектара ўлiку i размеркавання жылля ўпраўлення гарадской гаспадаркi i будаўнiцтва Слонiмскага райвыканкама Святлана Шухно, згодна з пунктам 1.9 Указа кiраўнiка дзяржавы № 185 ад 14 красавiка 2000 года, крэдыты пад набыццё жылля мнагадзетным сем’ям выдаюцца ў выпадках, калi будаўнiцтва гэтага самага жылля немагчымае.

— Зараз у горадзе завершана фармiраванне трох будаўнiчых кааператываў, на падыходзе — чацвёрты. Як бачна, магчымасць пабудаваць жыллё ёсць, — сказала Святлана Шухно. — Iльготны крэдыт мнагадзетнай сям’i на будаўнiцтва можа быць прадастаўлены на 40 гадоў пад 3 працэнты гадавых, пры гэтым сума першага ўзносу складзе 5 працэнтаў ад кошту будоўлi.

Больш падрабязную iнфармацыю можна даць заяўнiкам толькi пасля таго, як будзе вядома ўся патрэбная iнфармацыя.