Наводзiм парадак самi

Источник материала:

А Ў НАС... А Ў ВАС?

— Куды варта, — абураецца ён, — калi жыхары вёскi, змайстраваўшы сваiмi рукамi для сябе студню з сельсаветаўскiх матэрыялаў, патрабуюць грошы за работу?!

Мае рацыю паважаны Юлiй Ягоравiч. Дзесьцi мы далi прамашку ў арганiзацыi работы органаў грамадскага самакiравання. Адчуваючы гэта, прэзiдыум раённага Савета дэпутатаў задумаўся, як яе палепшыць.

У гэтай справе ў нас ёсць пэўны вопыт. У адпаведнасцi з Законам «Аб мясцовым кiраваннi i самакiраваннi ў Рэспублiцы Беларусь» раённым Саветам дэпутатаў зацверджаны палажэннi аб органах тэрытарыяльнага грамадскага самакiравання i аб старэйшыне населенага пункта. (Гэтыя дакументы зарэгiстраваны ў сельвыканкамах i аддзеле па будаўнiцтву, архiтэктуры i жыллёва-камунальнай гаспадарцы райвыканкама.) Такiм чынам прэзiдыум вырашыў зрабiць будучы год годам актывiзацыi самакiравання.

Дарэчы, сустракаючыся з калегамi, чую ад некаторых з iх нараканнi на недастатковасць уладных паўнамоцтваў. Але ўлада — перш за ўсё высокая адказнасць. Наракаць — гэта значыць быць у ролi пакрыўджанага. Вось прыклад. У в. Палуж-2 калодзеж ля сельскага магазiна знаходзiўся ў непрывабным стане. Вяскоўцы ў поўны голас наракаюць. А на каго? Стараюся ўдакладнiць. Маўчанне. Называю канкрэтнага вiноўнiка — старшыню Высакаборскага сельскага Савета дэпутатаў, дэпутата раённага Савета дэпутатаў Г. А. Слабодчыкаву. Ды не, кажуць, яна ў нас чалавек справы. А хто тады? Вядома, агульная безадказнасць як мясцовай улады, так i самiх вяскоўцаў, якiя прывыклi, маючы статус чарнобыльцаў, да нахлебнiцтва ў адносiнах да дзяржавы. (Праз некалькi дзён пасля гэтага вяскоўцы самi прывялi свой калодзеж у нармальны стан.)

На тэрыторыi нашага раёна органы мясцовага самакiравання вывучаюць грамадскую думку па розных пытаннях сацыяльна-эканамiчнага развiцця тэрыторыi. У iх кампетэнцыю ўваходзiць далучэнне жыхароў да добраўпарадкавання жылых дамоў, азелянення месцаў агульнага карыстання, рацыянальнага выкарыстання прыродных рэсурсаў. Яны садзейнiчаюць праваахоўным органам у забеспячэннi грамадскага парадку i прафiлактыцы правапарушэнняў, удзельнiчаюць у арганiзацыi работы з сем’ямi. Дапамагаюць закупаць лiшкi сельскагаспадарчай прадукцыi ў насельнiцтва i iншае.

На адной з сесiй раённага Савета дэпутатаў iшла дзелавая i прынцыповая размова аб выкананнi пастановы Савета Мiнiстраў № 724 «Аб мерах па ўкараненню сiстэмы дзяржаўных стандартаў па абслугоўванню насельнiцтва». У жыллёва-камунальнай гаспадарцы з 11 стандартаў не забяспечана выкананне чатырох: гэта норма i графiк падачы гарачай вады ў кватэры насельнiкаў райцэнтра, асвятленне як у самiм Краснаполлi, так i ў сельскай мясцовасцi, дарожнае пакрыццё вулiц. Ёсць праблемы ў транспартным абслугоўваннi насельнiцтва.

Зыходзячы з гэтага, былi вызначаны канкрэтныя меры па выкананню сацыяльных стандартаў, а раённы Савет дэпутатаў вызначыў напрамкi i адказных (раённыя службы, сельскiя саветы, кiраўнiкi гаспадарак). Не абышлося без зваротаў да рэспублiканскiх i абласных арганiзацый. Раённым Саветам накiраваны просьбы да Камчарнобыля — па вырашэнню пытанняў рэабiлiтацыi вёскi Выдранка, да «Магiлёўаблдарбуда» — па асфальтаванню 2,9 км дарогi Краснаполле—Янаўка i выдзяленню спецаўтамабiля «ГАЗель» па падвозу дарожнiкаў ДРБУ-173, да цэнтра занятасцi аблвыканкама — па выдзяленню 50 мiльёнаў рублёў для правядзення сацыяльна-карысных работ па добраўпарадкаванню сельскiх населеных пунктаў, да абласнога камiтэта прыродных рэсурсаў i аховы навакольнага асяроддзя — па навядзенню парадку на зямлi ў сельскай мясцовасцi i г.д.

Вядома, давесцi патрабаваннi да месцаў — справа даволi простая. А далей? Цi будуць яны выконвацца? Каб даць станоўчы адказ на гэтыя пытаннi, неабходна акунуцца ў стан спраў надзённых. А тут без дзейснага i строгага кантролю не абысцiся. Роля Саветаў усiх узроўняў, органаў мясцовага самакiравання тут самая актыўная. А наогул ёсць у нас думка: дзейнасць вулiчных, дамавых, сельскiх камiтэтаў, а таксама старэйшын прывесцi ва ўзаемадзеянне з работай дэпутатаў раённага i сельскiх саветаў. Гэта будуць аб’яднаннi па акругах раённага i сельскiх Саветаў дэпутатаў — з удзелам самiх дэпутатаў i ячэек мясцовага самакiравання. Да арганiзацыйнай работы далучацца прэзiдыум i пастаянныя камiсii раённага Савета, сельскiя саветы i сельскiя выканаўчыя камiтэты, раённы савет органаў тэрытарыяльнага самакiравання. Напрамкi дзейнасцi будуць зыходзiць з патрабаванняў Закона «Аб мясцовым кiраваннi i самакiраваннi». На наш погляд, задума добрая, варта толькi яе падмацаваць канкрэтнай жывой i творчай работай.

Слушнай лiчу прапанову аб наданнi статусу старэйшын старшыням дамкамаў у васьмi- i дванаццацiкватэрных дамах райцэнтра. Там праведзены ўжо сходы пражываючых, якiя выбралi самых аўтарытэтных i прынцыповых «дамавых». I справы пайшлi на лад — гэта бачна па добраўпарадкаваных лесвiчных пляцоўках i тэрыторыях вакол дамоў.

Прэзiдыумам райсавета, аддзелам райвыканкама, сельскiм Саветам даручана распрацаваць палажэнне аб прысваеннi ганаровага звання лепшага старшынi селькама, вулiчнага i дамавога камiтэтаў, старэйшыны населеных пунктаў. У рашэнне раённага Савета па прапанове старшынi райвыканкама С. Я. Казлова была ўнесена прапанова аб стварэннi грашовага фонду па стымуляванню работы актывiстаў самакiравання.

Фёдар ГАНЧАРОЎ,

старшыня Краснапольскага раённага Савета дэпутатаў.