Гарадок з прыстаўкай «агра»

Источник материала:

Карэспандэнт прайшла па вулiцах Зубава са старшынёй Зубаўскага сельсавета Мiкалаем Лугаўцовым.

Пачнём з адмiнiстрацыйнага будынка мясцовай улады — сельсавета. Пасля рэканструкцыi i «начынкi» яго новай мэбляй ён адпавядае сучаснай афiцыйнай установе. У такiх умовах лепш адчуў свой «статус» i Мiкалай Лугаўцоў. Што нi кажы, а ён першы старшыня сельсавета ў раёне, якi ўладарыць у аграгарадку.

На другiм ад сельсавета баку вулiцы зусiм нядаўна можна было сузiраць звычайны сельмаг. Цяпер тут — гандлёвы цэнтр, у склад якога ўваходзяць прадуктовы i прамтаварны магазiны, кафэ i кааператыўны ўчастак. Новаўвядзенне гандлёвага цэнтра — кааператыўны ўчастак, дзе прапануюць 20 вiдаў паслуг, у тым лiку такiя важныя для вяскоўцаў, як распiлоўка дроў i апрацоўка зямлi. Ёсць тут i пункт пракату, дзе прапануюць тэлерадыёапаратуру i набор рыштунку для работы на прысядзiбных участках. Тут жа можна выкарыстаць па прызначэнню сучасную пральную машыну альбо ўзяць яе на пракат. Кааператыўны ўчастак утрымлiваецца ў рабочым стане дзякуючы Аршанскаму райпо.

Непадалёк ад гандлёвай плошчы — комплексны прыёмны пункт бытавога абслугоўвання жыхароў. Тут аказваюць 11 вiдаў паслуг.

— Клiентаў у нас дастаткова, — гаворыць загадчыца пункта бытавога абслугоўвання Наталля Беларуская. — Нясуць людзi ў рамонт абутак, адзенне i тэлерадыёапаратуру. У цырульню чарга, як у горадзе.

А вось сталыя людзi найперш ацанiлi пашырэнне медыцынскага абслугоўвання.

Раней у Зубаве быў ФАП. Цяпер у рэканструяваным будынку адкрылi амбулаторыю. Калiсьцi вёску i акругу абслугоўваў адзiн фельчар, цяпер тут 4,5 стаўкi доктара. У амбулаторыi ёсць стаматалагiчны, гiнекалагiчны, тэрапеўтычны, працэдурны кабiнеты, а таксама лабараторыя. Будзе i машына хуткай дапамогi. Начынiць амбулаторыю сучасным абсталяваннем абяцаюць у хуткім часе.

Нядаўна ж быў канчаткова здадзены ў эксплуатацыю i фiзкультурна-аздараўленчы комплекс, якому i ў горадзе пазайздросцяць. Ёсць некалькi спартыўных залаў, добрая хакейная «каробка», раздзявальнi, душавыя. Урокi фiзкультуры, спартыўныя секцыi настаўнiкi мясцовай школы праводзяць з вучнямi менавiта тут.

Добраўпарадкавалi i вёску ў цэлым: адрамантавалi дахi i фасады дамоў, газiфiкавалi населены пункт, замянiлi старую сiстэму цепла- i водазабеспячэння ва ўсiм населеным пункце. Толькi жывi i радуйся. Праўда, ёсць яшчэ адзiн аспект, неабходны для паўнакроўнага жыцця людзей: работа i, як вынiк, добры заробак. Калi будзе праца, тады не апусцее Зубава, не дарэмна будуць патрачаны грошы на добраўпарадкаванне вёскi.

Старшыня сельсавета расказвае, што Зубава — гэта цэнтральная сядзiба гаспадаркi «СПК «Купалаўскi». Тут засяроджана галоўная вытворчасць, у прыватнасцi, сучасна абсталяваны жывёлагадоўчы комплекс на паўтары тысячы галоў. Жывёлаводы працуюць у белых халатах i заробкамi задаволеныя. З цягам часу на комплексе плануецца адкрыць цэх па перапрацоўцы малака. Пры такой раскладцы з’явяцца i дадатковыя рабочыя месцы. На мехдвары гаспадаркi маецца багаты парк машын, на якiх працуюць пераважна маладыя механiзатары. З пераўтварэннем Зубава ў аграгарадок сюды iмкнуцца шмат прыезджых, адмiнiстрацыя гаспадаркi ў сваю чаргу стараецца выбраць з iх лiку самых квалiфiкаваных спецыялiстаў. У вынiку колькасць жыхароў вёскi расце.

Калi ў наяўнасцi такi «прырост» — значыць, трэба будаваць жылле. Сёлета тут здалi «пад ключ» 18 новых дамоў. На наступны год запланавана пабудаваць яшчэ 22. З 10 дамоў фармiруюць асобную вулiцу, яшчэ 12 пабудуюць там, дзе ёсць вольныя ўчасткi зямлi.

У вёсцы, паводле слоў старшынi сельсавета, працуе каля сотнi маладых людзей. Напрыклад, механiзатар Андрэй Лубчынскi прыйшоў сюды пасля заканчэння Дубровенскага прафтэхвучылiшча. Летам на адвозцы збожжа стаў прызёрам спаборнiцтва ў сваёй гаспадарцы. Атрымаў прэмiю. А па восенi паказаў добрыя вынiкi працы на энерганасычаным трактары. У Андрэя ёсць нявеста, i, калi справа дойдзе да вяселля, хлопец спадзяецца, што маладой сям’i выдзеляць жыллё.

Застаецца толькi дадаць, што ў Аршанскiм раёне да 2010 года плануецца пабудаваць 15 такiх аграгарадкоў.