БУДЗЬМА!

Источник материала:

Анталогiя беларускай песнi

«Нам вельмi спадабалася песня «Будзьма!», якую спяваў заслужаны артыст Беларусi Якаў Навуменка летась на Рэспублiканскiм свяце «Дажынкi» ў Слуцку. Гэтая задушэўная песня надта прыдатная для выканання як на сцэне, так i ў застоллi. Надрукуйце яе, калi ласка, на старонках «Звязды», — з такой просьбай звярнулася ў рэдакцыю ад iмя аматараў спеву вёскi Сцяцкi Стаўбцоўскага раёна Вера Яфiмаўна Клiмовiч.

Словы Рыгора Барадуліна.

Музыка Эдуарда Зарыцкага.

Музыку лiрычнай, поўнай роздуму песнi «Будзьма!» напiсаў кампазiтар, народны артыст Беларусi Эдуард Зарыцкi, якi ўчора адзначыў сваё 60-годдзе. У музычнай прасторы нашай Радзiмы пастаянна гучаць мелодыi многiх яго песень. Сярод iх — «Паверце, дзеванькi», «Замова», «Палыновая ростань», «Белыя крылы», «Паспяшайся, кумок», «На паруках настальгii», «Развiтальная гастроль», «Трэлi салаўя», «Бацькоўскую хату любiце», «Незабудкi». Апошнiм часам кампазiтар актыўна звяртаецца да вакальных цыклаў. Нацыянальны канцэртны аркестр Беларусi пад кiраўнiцтвам Мiхаiла Фiнберга падрыхтаваў i з поспехам выканаў яго вакальныя цыклы на вершы Адама Мiцкевiча (у перакладзе Васiля Жуковiча), Рыгора Барадулiна, Якуба Коласа, Уладзiмiра Караткевiча. Плённа працуе Эдуард Зарыцкi i ў iншых жанрах.

Мiхась ШАВЫРКIН.

Доля праедзе ў дрогкай карэце,

Следам пасцелецца дым.

Хай жа на гэтым

Сустрэнемся свеце

Перад сустрэчай на тым.

Будзьма радасць гукаць!

Будзьма долю шукаць!

Хай жа на гэтым

Сустрэнемся свеце

Перад сустрэчай на тым.

Ноччу раптоўнае стане

дасвецце,

Ясень зялёны — сiвым.

Будзьма на гэтым

Бяседзiцца свеце,

Каб не згубiцца на тым.

Будзьма радасць гукаць!

Будзьма долю шукаць!

Будзьма на гэтым

Бяседзiцца свеце,

Каб не згубiцца на тым.

З хатаў i душ нашых

Вымецем смецце.

Хай будзе келiх як брат.

Лепей на гэтым

Пахмелiмся свеце.

Той налiе нам наўрад.

Будзьма радасць гукаць!

Будзьма долю шукаць!

Лепей на гэтым

Пахмелiмся свеце.

Той налiе нам наўрад.