Мiнчукi, беражыце «мабiльнiкi»!

Источник материала:

Падрабязнасцi

Мiнск у мiнулым годзе перажыў своеасаблiвае нашэсце «кiшэнных» зладзеяў. Летась у нашай сталiцы было зарэгiстравана каля 6 тысяч такiх крадзяжоў, што амаль у 2 разы больш, чым у 2004 годзе. Прычым, як паведамiў начальнiк Галоўнага ўпраўлення ўнутраных спраў (ГУУС) Мiнгарвыканкама Анатоль Куляшоў, найчасцей «трафеямi» гэтай катэгорыi зладзеяў былi сотавыя тэлефоны. Усяго, па звестках кiраўнiка сталiчнай мiлiцыi, «кiшэннiкi» выцягнулi каля 7 тысяч «мабiльнiкаў». Раскрывальнасць такiх злачынстваў зусiм невялiкая — 5 працэнтаў. Гэта значыць, у ахвяры кiшэннага злодзея толькi адзiн шанц з дваццацi вярнуць сваю маёмасць.

Так што, паважаныя мiнчукi, будзьце пiльнымi! Захаванне вашай маёмасцi залежыць у многiм менавiта толькi ад вас. Хоць, як запэўнiў генерал Куляшоў, сталiчная мiлiцыя таксама актывiзуе свае дзеяннi па выяўленню «кiшэннiкаў». Паводле яго слоў, у палку барацьбiтоў з «цiхмянымi зладзеямi» з’явiлася папаўненне. З лiку лепшых супрацоўнiкоў патрульна-паставой службы мiлiцыi сфармiравана дадаткова некалькi груп, якiя будуць весцi «паляванне на кiшэннiкаў». Анатоль Куляшоў упэўнены, што вынiкi працы яго падначаленых у гэтым накiрунку сёлета будуць лепшыя. Праўда, генерал не даў гарантый, што кiшэнных крадзяжоў будзе менш i заклiкаў грамадзян самiх клапацiцца пра захаванне ўласнай маёмасцi.

I ўсё ж, як лiчыць кiраўнiцтва ГУУС, «кiшэннiкi» i iншыя зладзеi ( летась у сталiцы менавiта за кошт крадзяжоў, доля якiх складае 60 працэнтаў, адбыўся рост злачыннасцi: зафiксавана каля 40 тысяч злачынстваў, што на 11 тысяч больш, чым у 2004 годзе) хоць i сапсавалi статыстычныя паказчыкi, але не аказалi ўплыву на пагаршэнне крымiнагеннай сiтуацыi.

Генерал Куляшоў адзначыў, што ў мiнулым годзе зафiксавана на 320 менш цяжкiх i асаблiва цяжкiх злачынстваў, дасягнуты значныя поспехi ў iх раскрыццi. Напрыклад, раскрывальнасць забойстваў склала 92 працэнты. Усяго летась зарэгiстравана 87 такiх злачынстваў.

Увогуле, паводле вынiкаў мiлiцэйскага анкетавання (у iм бралi ўдзел больш за тысячу мiнчукоў), летась усе службы i падраздзяленнi ГУУС упершыню атрымалi станоўчы рэйтынг. Ступень даверу да сталiчных мiлiцыянераў вырасла на 5 працэнтаў. Больш як 15 працэнтаў апытаных адзначылi, што крымiнагенная сiтуацыя ў Мiнску палепшылася.