Рыхтуем насенне

Источник материала:

Рубрыку вядзе Ірына Самулевіч, тэл. 287-18-74

У буйнога насення — гароху, кабачкоў, агуркоў, гарбузоў — многае бачна ўжо пры вiзуальнай ацэнцы. Тут трэба адкiнуць траўмiраванае, дробнае, са слядамi захворванняў, з нетыповай для асноўнай масы афарбоўкай насенне. Можна адсартаваць насенне ў растворы солi (выдаляюць тыя, якiя ўсплылi). Акрамя сартыроўкi мэтазгодна правесцi калiброўку: падзялiць насенне па памеру i па масе, каб яно прарасло адначасова.

Можна выканаць i iншыя працэдуры. Напрыклад, пратручванне насення. Яно праводзiцца з мэтай засцярогi будучых раслiн ад грыбковых i бактэрыяльных захворванняў. Пратручванне можа ажыццяўляцца сухiм i вiльготным спосабамi. Пратручванне сухiм спосабам падыходзiць для насення цеплалюбiвых культур (агуркоў, гарбузоў, буракоў, асаблiва, калi iх захоўвалi на холадзе). Такому насенню трэба арганiзаваць сонечны абагрэў на адкрытым паветры на працягу 3-4 дзён. Пры гэтым насенне трэба перыядычна памешваць. Сонечныя промнi абеззаражваюць насенне i паскараюць яго прарастанне.

Для рэалiзацыi вiльготнага пратручвання трэба замачыць насенне ў якiм-небудзь абеззаражвальным растворы. Напрыклад, гэта можа быць 0,2-працэнтны раствор марганцавакiслага калiю. Пакладзiце насенне ў марлевы мяшочак i вытрымайце ў растворы 20 мiнут, потым прамыйце i для аднаўлення сыпучасцi падсушыце.

Таксама добра замачыць насенне на 6 гадзiн у соку алоэ, разбаўленым вадой 1:1. Пасля гэтага яго таксама прамыць чыстай вадой i падсушыць.

Абеззаражванне гарачай вадой. Каб апрацаваць насенне гарачай вадой, трэба змясцiць яго ў марлевы цi палатняны мяшочак i апусцiць у ваду з тэмпературай 50—52°С на 25—30 мiнут. Калi насенне буйное, то тэмпература можа быць да 54°С. Пасля такой апрацоўкi насенне трэба патрымаць у халоднай вадзе, прасушыць i захоўваць да сяўбы ў папяровых пакетах. Насенне агуркоў, гарбузоў, кабачкоў трэба праграваць пры тэмпературы 55—60°С 3-4 гадзiны.