«БЕЛАРУСБАНК»: словы не разыходзяцца са справай...

Источник материала:

На працягу тыдня чытачы «Звязды» мелi магчымасць завочна задаць пытаннi банкiру, а таксама больш за гадзiну доўжылася размова Валянцiны Захараўны з людзьмi падчас прамой лiнii, што праводзiлася рэдакцыяй. Пытанняў было шмат, прычым многiя з iх пераклiкалiся: найбольш часта цiкавiлiся ўмовамi крэдытавання будаўнiцтва жылля, выдачай крэдытаў на тыя ж спажывецкiя патрэбы, сiстэмай будаўнiчых зберажэнняў, па якой плануе працаваць «Беларусбанк», а таксама ўмовамi прадастаўлення iншых паслуг, якiя аказваюцца сiстэмаўтваральным банкам краiны.

— Збiраюся будаваць кватэру ў Мiнску i бяру камерцыйны крэдыт у валюце. Цi змагу я перавесцi гэты крэдыт на льготны, калi ў маёй сям’i народзiцца трэцяе дзiця?

Сяргей Астапаў, г. Мiнск.

— Не, не зможаце, бо гэта не прадугледжана заканадаўствам. А праз колькi месяцаў плануецца прыбаўленне ў вашай сям’i?

— Прыкладна праз сем месяцаў, але грошы на будаўнiцтва трэба ўносiць зараз.

— Дом, канешне, праз сем месяцаў не пабудуюць. А таму вам лепш знайсцi магчымасць i аплацiць першыя ўзносы за кошт уласных сродкаў. А пасля нараджэння дзiцяцi вы адразу можаце падаць заяву ў раённую адмiнiстрацыю, каб з агульнай чаргi вас перавялi ў чаргу для шматдзетных сем’яў. I тады на завяршэнне будаўнiцтва вы зможаце атрымаць iльготны крэдыт. Абавязковая ўмова атрымання льготнага крэдыту — уключэнне вашай сям’i ў спiс iльготнага крэдытавання, якi павiнен быць зацверджаны Мiнгарвыканкамам.

— Валянцiна Захараўна, вас турбуе Валянцiна Сямёнаўна Лiсоўская з Пастаўскага раёна. Я звярталася да вас на прамую лiнiю 27 лiстапада 2001 года i прасiла пасадзейнiчаць у атрыманнi крэдыту на будаўнiцтва жылля для сваёй дачкi. Пытанне было вырашана, за што я хачу сказаць вам вялiкi мацярынскi дзякуй. Вашыя словы, што прыемна, не разышлiся са справай.

— Дзякуй, Валянцiна Сямёнаўна, за цёплыя словы...

— Калi я ўзяла вялiкi крэдыт на будаўнiцтва жылля, цi могуць мне выдаць крэдыт на спажывецкiя патрэбы, напрыклад, на набыццё мэблi?

Алена Даўжанок, г. Мiнск.

— Вы колькi плацiце ў месяц на пагашэнне крэдыту?

— 250 долараў.

— Гэта ўся ваша зарплата?

— Яшчэ крыху застаецца.

— У вас, я так разумею, ёсць сямейны даход. Таму, калi вы пацвердзiце, што даходу вашай сям’i будзе дастаткова для пагашэння крэдыту, узятага на будаўнiцтва жылля, i яго хопiць для пагашэння крэдыту на спажывецкiя патрэбы, банк пойдзе вам насустрач i выдасць крэдыт. У адваротным выпадку мы не рызыкнём выдаваць новы крэдыт. Карацей, вам неабходна пацвердзiць дакументамi, што вы маеце магчымасць пагашаць крэдыт на будаўнiцтва i крэдыт на спажывецкiя патрэбы, i ў вас ёсць на гэта адначасова паручыцелi.

— Мой сын браў пазыку ў «Беларусбанку» на будаўнiцтва жылля два гады таму. У нас ёсць чэкi «Жыллё», што падаравала бабуля. Цi можа сын пагасiць гэтымi чэкамi частку сваёй пазыкi?

Уладзiмiр Герасiмавiч Пяскоў, г. Петрыкаў.

— Гэтае пытанне не ўваходзiць у кампетэнцыю банка. Калi ваш сын звернецца ў выканкам па месцы жыхарства i апошнi прыме рашэнне аб напраўленнi падараваных чэкаў на пагашэнне запазычанасцi па крэдыту, то банк з задавальненнем прыме гэтыя сродкi для пагашэння крэдыту.

— Я хачу ўзяць крэдыт на будаўнiцтва жылля. Крэдыт не льготны. Якi будзе працэнт па рублёваму крэдыту?

Алена Дзядок, г. Мiнск.

— Калi вы знаходзiцеся на ўлiку маючых патрэбу ў паляпшэннi жыллёвых умоў, то гэта будзе 15 працэнтаў гадавых на 15 гадоў. Крэдыт вы будзеце пагашаць роўнымi часткамi на працягу 15 гадоў.

— А валютны крэдыт?

— Валютны крэдыт выдаецца на 10 гадоў пад 12 працэнтаў гадавых.

— А цi змагу я па магчымасцi пагасiць крэдыт раней?

— Так, крэдытным дагаворам прадастаўляецца магчымасць датэрмiновага пагашэння крэдыту. Магчыма, iншыя банкi не iдуць на падобны крок, а мы такое права прадастаўляем, i працэнты вы заплацiце толькi за фактычны час, напрыклад, за тры-пяць гадоў.

— Я хачу ўзяць, напрыклад, 10 тысяч долараў ЗША крэдыту. Арыенцiровачна, якая зарплата ў мяне павiнна быць, i цi патрэбны мне паручыцелi, каб атрымаць крэдыт?

— Паручыцелi вам неабходны, прычым не менш чым два чалавекi. Што датычыцца заработнай платы, то для атрымання крэдыту ў 10 тысяч долараў, ваш чысты даход павiнен быць 650 тысяч рублёў.

— I яшчэ наконт рублёвага крэдыту: стаўка ў 15 працэнтаў па iм фiксаваная або яна можа мяняцца?

— Яна можа мяняцца. Стаўка па крэдыту «плаваючая», аднак будзем спадзявацца, што павялiчвацца яна не будзе — эканамiчная сiтуацыя ў Беларусi паляпшаецца, i стаўка рэфiнансавання падае. У нас пры знiжэннi стаўкi рэфiнансавання знiжаецца i стаўка па зноў выдаваемых крэдытах. Банк можа знiжаць стаўку i па тых крэдытах, што людзi атрымалi раней. Летась мы чатыры разы знiжалi стаўкi па крэдытах, якiя ўжо дзейнiчалi.

— Я i муж — пенсiянеры. Стаiм на чарзе ў райвыканкаме на будаўнiцтва кватэры. Цi можам мы ўзяць крэдыт на будаўнiцтва жылля?

Валянцiна Мiкалаеўна, г. Мiнск.

— Усё залежыць ад таго, якi ў вас узрост. Вы працуеце?

— Працуем. А будаваць жыллё мы будзем тое, што прадастаўляюць па месцы працы.

— Тады на крэдыт вы можаце прэтэндаваць пры ўмове, што паручыцелямi будуць вашы працаздольныя, дарослыя, якiя маюць пастаянны даход, блiзкiя сваякi, лепш за ўсё дзецi.

— А цi зможа чалавек, у якога мы з’яўляемся паручыцелямi, быць паручыцелем у нас?

— Не, канешне, не можа, таму што ў яго ёсць крэдыт. Шукайце свабоднага паручыцеля.

(Працяг будзе.)