Мінская абласная клiнiчная бальнiца выходзiць на сусветны ўзровень

Источник материала:

— Бальнiца гэтая — наш твар, цэнтр развiцця медыцыны. Тут праходзяць лячэнне не толькi жыхары вобласцi — прыязджаюць з усёй краiны. Дзякуючы «залатым» рукам медыкаў, iх працы на новым, суперсучасным абсталяваннi, якасць лячэння стала вельмi высокай.

Карэспандэнт газеты наведаў абласную клiнiчную бальнiцу i на ўласныя вочы пабачыў вынiкi мадэрнiзацыi. Напэўна, самае галоўнае — новае аддзяленне гемадыялiзу, або «штучнай ныркi». Iх колькасць па ўсёй краiне невялiкая, а ў абласной клiнiчнай бальнiцы апараты ёсць у рэанiмацыйным пакоi, для часовай дапамогi перад i пасля хiрургiчных аперацый, напрыклад, па трансплантацыi донарскай ныркi. Было набыта i абсталяванне «штучнай ныркi» для падтрымкi пастаяннай жыццядзейнасцi арганiзма чалавека.

— Адзiн сеанс лячэння каштуе каля 450 тысяч рублёў. Сума значная, але зараз мы можам гэта сабе дазволiць, — кажа галоўны саветнiк старшынi Мiнскага аблвыканкама Генадзь Казлоў. — Пасля аперацыi пацыенту праводзiцца мiнiмум два-тры сеансы тэрапii, у залежнасцi ад стану. У вобласцi каля 60 чалавек маюць патрэбу ў гемадыялiзе. Абласная бальнiца падрыхтаваная да большай, чым раней, колькасцi хворых.

Дзякуючы аблвыканкаму набыты i апарат мультыфiльтрацыi нырак. «Дагэтуль у рэспублiцы была толькi адна такая «машына». I вось з’явiлася другая. Апарат выкарыстоўваюць пры атручэннi, для ачышчэння арганiзма чалавека ад таксiнаў. Дарэчы, каштуе ён велiзарную суму», — зазначае галоўны ўрач установы Юрый Ладуцька.

Раней для правядзення абследаванняў пацыенты звярталiся ў сталiчныя медыцынскiя ўстановы. Зараз праблема знiкла, разам з чэргамi: у клiнiчнай бальнiцы з’явiлася апаратура для магнiтна-рэзананснай тамаграфii.

— Новае абсталяванне дазваляе праводзiць абследаванне самых розных органаў i, ўвогуле, стану здароўя чалавека за адзiн сеанс. Адсутнiчае прамянёвая нагрузка на арганiзм, як, напрыклад, было пры рэнтгене. Аналагiчная германская апаратура стаiць у лепшых медыцынскiх установах свету, — падкрэслiў падчас «дэманстрацыi» свайго працоўнага месца доктар кабiнета магнiтна-рэзанаснай тамаграфii Дзмiтрый Дармаеў.

Напрыканцы зазiрнулi ў адзiн з аперацыйных пакояў. Клiнiка ў асноўным хiрургiчная, 540 месцаў у ёй аддадзена менавiта для гэтага профiлю. Кожны дзень у бальнiцы робiцца да 60 аперацый, i таму аперацыйныя блокi павiнны быць на адпаведным узроўнi. Медыцынскi персанал расказаў i пра сiстэму кандыцыяніравання памяшкання, i пра спецыяльныя панэлi на сценах. Але i без гэтага было зразумела, што аперацыйны блок у абласной бальнiцы — адзiн з лепшых. Створаны ўсе ўмовы для правядзення любых вiдаў аперацый. Клiнiка была пабудавана трыццаць гадоў таму, i з таго часу шмат чаго змянiлася. Але менавiта зараз урач атрымлiвае той вынiк ад праведзенай хiрургiчнай аперацыi, на якi разлiчваў.

Як зазначыў начальнiк упраўлення аховы здароўя Мiнскага аблвыканкама Iван Лiпнiцкi, у Мiнскай абласной клiнiчай бальнiцы адрамантаваны чатыры аперацыйныя, праз месяц будуць мадэрнiзаваны яшчэ столькi ж. Дапамога медыцынскiм установам за кошт сродкаў з абласнога бюджэту сёлета будзе працягвацца. Восем раёнаў Мiншчыны чакаюць рамонту сваiх медыцынскiх устаноў. На чарзе — пытанне аб набыццi ў раённыя бальнiцы апаратаў «штучных нырак» i iншага абсталявання.