Лечымся хлебам-соллю

Источник материала:

Кожнаму другому чалавеку знаёмы хваробы страўнiка. Каб пазбавiцца ад непрыемных адчуванняў, падсмажце кавалачак белага хлеба на адной чайнай лыжцы растопленага сметанковага масла. Калi хлеб астыне, змясцiце яго на 30 хвiлiн у шклянку з пiтной вадой. Атрыманы настой трэба пiць 3—4 разы на дзень.

Калi замучыла ангiна — лустачку белага хлеба трэба апусцiць у кiпячае малако, пасля чаго, калi мякiш намокне i крыху астыне, яго трэба дастаць i з’есцi. Паўтараць такую працэдуру трэба тры разы на дзень. Танна, смачна, а галоўнае, эфектыўна.

А вось пры прастудзе добра дапаможа соль. Разагрэйце яе на патэльнi (без масла, зразумела) да такой тэмпературы, каб балюча было дакрануцца, насыпце ў палатняны мяшэчак цi звычайную баваўняную шкарпэтку i прыкладзiце да ног, надзеўшы пасля гэтага шарсцяныя панчохi. А вось з прыкладаннем такiх мяшэчкаў да носа асцеражыцеся. Перавысiце тэмпературу — потым праблем не аберацеся. Можна таксама паласкаць соллю горла. Пры прастудах дапамагае не горш, чым паласканне содай.

Соль таксама дапаможа пазбавiцца ад дэпрэсii i астэнii. У такiх выпадках дзве чайныя лыжкi солi разводзяць у 1 л вады i абцiраюцца гэтым растворам па ранiцах.

А пры гнойных ранах (але толькi закрытых) соль i зусiм цудадзейны сродак. Нагнаiўся палец — змясцiце яго ў цёплую ванначку з соллю. Праз некаторы час гнайнiчок адкрыецца, i вам стане значна лягчэй.

Калi ж справа не ў гнайнiках, а ў запаленнi на скуры, тады мэтазгодна будзе скарыстацца пшанiчным хлебам. Яго трэба здрабнiць, змяшаць з вадой, дадаць мёду да атрымання вязкай масы. Накладвайце гэту сумесь на хворае месца па некалькi разоў на дзень. Трымаць трэба па 15—20 хвiлiн.

Пшанiчны хлеб з дабаўленнем жытняга таксама карысны i пры бяссоннiцы. I той i iншы трэба дробна пакрышыць i змяшаць у роўных прапорцыях. Пасля гэтага дадайце некалькi лыжак агурочнага расолу, нарэзаную палову салёнага агурка i лыжку кiслага малака. Сумесь накладваюць на лоб ранiцай i вечарам на 10—15 хвiлiн, пасля чаго змываюць вадой.

Дарэчы, з хлебам звязана i шмат цiкавых прымет. У даўнiя часы, калi хлеб пяклi ў кожным доме, лiчылася, што калi ў гаспадынi хлеб атрымаўся на славу, дом будуць абыходзiць хваробы i нягоды. I наадварот, дрэнна выпечаны хлеб нясе няшчасцi. Часы тыя сышлi ў нябыт, але пакiнулi нам некалькi цудоўных правiлаў.

*Хлеб нельга выкiдваць. Хто зробiць гэта — абавязкова спазнае галодныя часы.

*Нельга без запрашэння браць апошнi кавалак хлеба з талеркi, асаблiва дзяўчатам на выданнi. А вось калi вам прапанавалi, нi ў якiм разе не адмаўляйцеся. Гэты кавалачак абавязкова прынясе вам удачу. Трэба толькi загадаць, чаго менавiта вы жадаеце.

*Калi ў вас дома нехта хварэе, пачастуйце яго першага свежавыпечаным хлебам i прасачыце, каб хворы адламаў кавалак ад бохана сваiмi рукамi. Тады хлеб перадасць сваю гаючую моц хвораму чалавеку i той абавязкова паправiцца.

*А вось класцi хлеб на стол «дагары нагамi» (акруглым бокам унiз) нi ў якiм разе нельга. Зробленае выпадкова — гэта да сваркi, а спецыяльна — да хваробы кармiльца сям’i.

Падрыхтавала Вольга ШАЎКО.