Сенiцкiя катэджы — прыезджым спецыялiстам

Источник материала:

Iнга МIНДАЛЁВА, Мiнскi раён

ЗЯМЛЯ І ЛЮДЗІ МІНШЧЫНЫ

Створаны год таму аграгарадок «Сенiца» (першы ў Мiнскiм раёне) па праву лiчыцца адным з узорных. Тут ёсць Цэнтр культуры, магазiны, Дом быту, палiклiнiка, сярэднеадукацыйная, музычная i конна-спартыўная школы, Мiнскi раённы лiцэй, дзяржаўны аграрна-камерцыйны каледж. А мясцовы дашкольны цэнтр развiцця дзiцяцi «Каласок», створаны на базе садка, сваёй матэрыяльнай базай i падыходамi да выхавання выклiкае здзiўленне i нават зайздрасць не толькi беларусаў, але i замежных гасцей, якiя часта завiтваюць сюды паднабрацца вопыту. У «Каласка» ёсць свой басейн з падагрэвам вады, дзе дзецi вучацца плаваць, экалагiчны пакой з жывымi кветкамi, папугаямi, хамячкамi i марскiмi свiнкамi, фiта-бар. У цэнтры функцыянуюць гурткi англiйскай мовы, харэаграфii, выяўленчага мастацтва, тэатральны, спартыўныя (баксетбольны, гiмнастыкi «Стрэйчынг»), экалагiчны. Развiтая iнфраструктура, стопрацэнтнае цэнтралiзаванае водазабеспячэнне жылля, рэгулярныя транспартныя зносiны i — нядрэнныя заробкi (у мясцовай гаспадарцы ААТ «Гастэлаўскае» ў мiнулым годзе сярэднi заробак склаў 450 тысяч рублёў) даюць усе ўмовы для дастойнага жыцця сенiнцаў. Аднак блiзкасць ад Мiнска з’яўляецца сур’ёзнай спакусай. Большасць жыхароў аграгарадка працуюць у сталiцы. I каб забяспечыць сябе прытокам дастойных высокаквалiфiкаваных спецыялiстаў, «Гастэлаўскае» будуе для сваiх работнiкаў новыя катэджы.

— Да нас прыязджаюць працаваць не толькi з Мiнскай вобласцi, ёсць i з Вiцебскай, i з Брэсцкай, — гаварыў дырэктар гаспадаркi Андрэй Некрэвiч. — У мiнулым годзе мы здалi 7 дамоў у вёсцы Скарынiчы i 11 — у вёсцы Ураджайная. Сёлета падрыхтавалi праекты на 5 аднакватэрых катэджаў у Лявонцьевiчах i адзiн двухкватэрны ў Сенiцы. Усе дамы — сядзiбнага тыпу, палепшанай планiроўкi i дызайну, з сучасных матэрыялаў, здаюцца, як кажуць, пад ключ. Пад будаўнiцтва бяром банкаўскiя льготныя крэдыты, прадугледжаныя дзяржпраграмай адраджэння вёскi. За два мiнулыя гады менавiта iнвестыцыi ў будаўнiцтва жылля ў нашым аграгарадку склалi 2 мiльярды 100 мiльёнаў рублёў. Сёння ў iнтэрнаце яшчэ пражываюць каля 30 нашых работнiкаў, таму мы будзем працягваць узводзiць па 5 дамоў у год, каб забяспечыць сябе працоўнымi рэсурсамi.