Iнтрыга пачалася

Источник материала:

Чэмпiянат Беларусi

Страты чэмпiянату

Беларускiя балельшчыкi больш не змогуць на свае вочы назiраць за гульнёй такiх майстроў, як Лянцэвiч, Разiн, Ганчарык, Амельчанка... Маршруты, па якiх накiравалiся гэтыя футбалiсты, вядомы даўно — Расiя i Украiна. Не хацелася б абражаць астатнiх, якiя выбралi для прадаўжэння кар’еры чэмпiянаты Казахстана, Лiтвы, Латвii, аднак усё-такi апошняе можна лiчыць максiмум таптаннем на адным месцы.

Экзотыка чэмпiянату

Безумоўна, самым яркiм выглядае тут вiзiт у Беларусь трох бразiльцаў, якiя падпiсалi кантракты з мiнскiм «Дынама». Прозвiшчы Марсiо, Жувенал i Адрыана мала што гавораць айчынным аматарам гульнi № 1 (улiчваючы, што Адрыана з «Iнтэру» застаўся ў Iталii), аднак большасць згаджаецца, што ў Бразiлii ў футбол умеюць гуляць усе. Застаецца верыць у тое, што «дынамаўскiя» бразiльцы прадэманструюць балельшчыкам свае ўменнi. Таксама цiкава будзе паназiраць за навiчкамi МТЗ-РIПА сербам Мамiчам i iвуарыйцам Саро.

Трэнеры чэмпiянату

Сярод трэнерскiх пераменаў засяродзiм сваю ўвагу на двух кандыдатурах. Юрый Пунтус сустракаў зiму ў якасцi галоўнага трэнера «маладзёжкi», а ў новы сезон уступае на пасадзе першага чалавека ў нацыянальнай зборнай. Вось i дачакалiся мы трэнера, якi будзе працаваць у нашым чэмпiянаце, а значыць, зможа выбраць лепшых з лепшых у склад нацыянальнай каманды. Новы галоўны трэнер брэсцкага «Дынама» Сяргей Бароўскi таксама паспеў папрацаваць у першай камандзе краiны, за мяжою, i вось цяпер зноў будзе несцi свае веды нашым футбалiстам.

Вяртаннi чэмпiянату

Раўнейка, Сашчэка, Тарлоўскi, Шунейка... Усе яны калiсьцi выступалi ў беларускiх камандах, выклiкалiся ў нацыянальную зборную i ў гэтым сезоне зноў з’явяцца на футбольных палях Беларусi. Гэта не ўлiчваючы таго, што вяртаюцца дадому Мiкалай i Аляксандр Асiповічы, Марозаў, Даўгалявец... Адным словам, нас чакае цiкавы марафон, якi скончыцца толькi восенню i назаве новых лаўрэатаў. Усё толькi пачынаецца.