Вёска хоча жыць прыгожа

Источник материала:

ПАРАДАК У ДОМЕ

Увогуле ў Славенскiм сельсавеце дэмаграфiчная сiтуацыя не з лепшых: летась тут памерлі 84 чалавекi, а нарадзiлася толькi 16. Праўда, такiя суадносiны iснуюць не паўсюль — у двух вёсках (Старых Стайках i Малой Сасноўцы) колькасць жыхароў апошнiм часам павялiчылася. Дзякуючы значным iнвестыцыям, палепшылася сiтуацыя i ў сельскай гаспадарцы: узраслi аб’ёмы вытворчасцi, адпаведна павысiўся i ўзровень жыцця вяскоўцаў. За непрацяглы час заробкi павялiчылiся ў 3-4 разы. Хто добра працуе — той някепскiя грошы атрымлiвае. Асобныя за месяц i да мiльёна рублёў зарабляюць. Так што працаваць у сельскай гаспадарцы становiцца прэстыжна.

Тым больш, што разам з развiццём вытворчасцi актыўна аднаўляецца i сацыяльная iнфраструктура.

— Па асобных пазiцыях у нас нават перавыконваюцца нарматывы дзяржаўных сацыяльных стандартаў, — заўважае старшыня Славенскага сельсавета Мiкалай Букоўскi.

У канцы мiнулага года вёска Малыя Славенi набыла статус аграгарадка. Добрая навiна для тутэйшых жыхароў: сюды нарэшце «прыйшоў» доўгачаканы прыродны газ. «Блакiтнае палiва» падвялi да кацельнi, з бюджэту выдзелена 130 мiльёнаў рублёў для таго, каб пракласцi газаправод i да дамоў вяскоўцаў. Праз пэўны час да газу плануецца падключыць жылфонд i вытворчыя памяшканнi мясцовай гаспадаркi — ЗАТ «Вялiкiя Славенi». Магчыма, што ў перспектыве «блакiтнае палiва» падвядуць i ў вёску Вялiкiя Славенi.

— З упэўненасцю можна казаць аб тым, што газаправод будзе пракладзены i ў блiжэйшую гаспадарку — закрытае акцыянернае таварыства «Амкадор-Шклоў», — кажа Мiкалай Букоўскi. — На гэтае палiва там перавядуць вытворчыя аб’екты, паралельна яго падвядуць i да жылых дамоў у вёсках Заброддзе i Любiнiчы.

За ўнутраную разводку жыхары павiнны будуць разлiчвацца з уласнай кiшэнi. Расцэнкi, канешне, «кусаюцца» (агульны кошт адпаведных работ складае каля 1,5 тысячы долараў), аднак вяскоўцы гатовы плацiць за выгоды. Тым больш, што ў банку на вельмi выгадных умовах можна ўзяць спецыяльны крэдыт.

Вельмi дарэчы прыйдзецца «блакiтнае палiва» для жыхароў Малых Славеняў, дзе ёсць цэлы «мiкрараён» шматпавярховых дамоў. Справа ў тым, што iх належнае ацяпленне — вельмi складанае пытанне, паколькi кацельня разлiчана на выкарыстанне мясцовых вiдаў палiва. Падчас моцных маразоў у кватэрах вяскоўцаў было холадна. Для таго, каб падтрымлiваць неабходную тэмпературу, на кацельню дадаткова завозiлi торфабрыкет i вугаль. Зараз, калi падвялi газ, такой праблемы не ўзнiкне, бо падчас маразоў можна будзе выкарыстоўваць «блакiтнае палiва».

Цяпер «вышынны квартал» абслугоўваюць работнiкi раённай камунальнай службы. Што справядлiва — кожны павiнен займацца сваёй справай. У шматпавярховiках адрамантавалi дахi, прывялi ў парадак фасады i пад’езды. Тут нават дворнiкi працуюць — прыбiраюць тэрыторыю.

Па вынiках мiнулага года Славенскi сельсавет па ўсiх паказчыках быў прызнаны лепшым. Па добраўпарадкаванню ён таксама заняў першае месца. Летась са сродкаў сельсавета на гэтыя патрэбы было выдаткавана 17 мiльёнаў рублёў. Практычна завершаны работы па асвятленню тутэйшых вёсак. Больш складаная сiтуацыя з дарогамi: паводле слоў Мiкалая Букоўскага, ёсць вёскi, якiя аддалены i ад аўтамабiльнай трасы, i ад цэнтра гаспадарак. Праехаць да iх вельмi цяжка. Каб выправiць сiтуацыю, у ДРБУ-175 створана спецыяльнае падраздзяленне, якое будзе рабiць падсыпку i рамонт унутрыгаспадарчых дарог. Славенскi сельскi Савет падаў заяўку на гэты год, у адпаведнасцi з якой тут неабходна давесцi да ладу 27 кiламетраў вулiц i 6,5 км пад’язных шляхоў да вёсак. На гэта неабходна выдаткаваць больш чым 100 мiльёнаў рублёў.

— Вёскi набываюць самы сучасны, прывабны выгляд, — кажа Мiкалай Букоўскi. — Тут ствараюцца ўсе ўмовы для жыцця. Канешне, шмат робiцца за дзяржаўныя грошы, аднак i мясцовыя жыхары не застаюцца ўбаку. Ва ўсiх вёсках у нас працуюць старасты, а ў шматпавярховiках створаны дамавыя камiтэты. Такая цесная сувязь з людзьмi дапамагае больш паспяхова вырашаць усе надзённыя пытаннi.

Мiкалай ЛIТВIНАЎ,

Шклоўскi раён.