Кароткi сон у «Майскую ноч»

Источник материала:

Акцыя

Сёлета ўжо прызначана тая «Майская ноч», якая будзе поўная мастацкiх нечаканасцяў. Збор абвешчаны ўвечары 20 мая, натуральна, у суботу, каб ранiцай наступнага дня не было балюча спускацца з аблокаў мастацтва на зямлю з яе звычайнымi справамi. Каб быў час добра абдумаць тое, што было ў музеi. А думаць дакладна трэба будзе. Таму што сёлета Нацыянальны мастацкi музей Беларусi прапануе «Выставу адной ночы». Тую, якую на наступны дзень ужо не ўбачыш. Тую, якую ўвогуле не так проста будзе ўбачыць: выставу лепшых плакатаў мастакоў Цэслера i Войчанкi.

Гэта тыя мастакi, якiя добра вядомыя сваiмi крэатыўнымi праектамi, арыгiнальнымi iдэямi i iх высокамастацкiм увасабленнем не толькi ў Беларусi, але i далёка за яе межамi. Уладзiмiр Цэслер i Сяргей Войчанка працавалi ў творчым тандэме 25 гадоў, iх iмёны здавалiся непадзельнымi. Да таго моманту, калi заўчасная смерць не забрала ў iншае жыццё Сяргея Войчанку. Цяпер Уладзiмiр Цэслер працуе адзiн. Але творы, якiя яны стварылi разам, лiчацца класiкай жанра, знаходзяцца ў калекцыях многiх музеяў свету, адзiн плакат ёсць у французскiм Луўры. Пасля акцыi пад назвай «Майская ноч» творы мастакоў Цэслера i Войчанкi папоўняць калекцыю Нацыянальнага мастацкага музея. Гэта будзе годная данiна памяцi Сяргею Войчанку, якi адлюстраваны на адным з плакатаў пад назвай «Вайна i мiр».

Такiм чынам, гэтай ноччу сапраўды будзе пра што паразважаць. Чакаецца, што самымi актыўнымi ўдзельнiкамi акцыi, як i летась, стануць маладыя людзi. Зрэшты, дзеля таго, каб моладзь пайшла ў музеi, усе гэтыя акцыi i былi прыдуманы ў тым жа Луўры.