На Мiншчыне будуюцца «сацыяльныя кватэры»

Источник материала:

Некаторыя навасёлы чакалi ўласнае жыллё ажно з 1978 года. Жыхарка Смалявiч Iрына Казлоўская стаяла на ўлiку пятнаццаць гадоў. Днямi яе сям’я — а ў Iрыны двое хлапцоў i дзве дзяўчынкi, атрымалi трохпакаёвую кватэру.

— Напэўна, самае галоўнае ў жыццi — гэта ўласны дах. Споўнiлася мая самая запаветная мара. Кватэра вельмi спадабалася — вялiкая, светлая, з усiмi выгодамi. З некаторымi суседзямi паспела пазнаёмiцца. Зараз думаем, хто ў якiм пакоi размесцяцца, якую мэблю трэба набываць... — толькi што атрымаўшая ключы ад уласнага жылля Iрына Казлоўская вельмi хвалюецца. Дзесяцiкватэрны дом, у якiм будзе жыць Iрына Казлоўская, рэканструяваны з памяшкання былога iнтэрната. Усе работы праводзiлiся мясцовым будаўнiчым прадпрыемствам ААТ «ПМК-72».

— Кошт рамонту i рэканструкцыi склаў каля 705 мiльёнаў рублёў. З працай будаўнiкi справiлiся за дзевяць месяцаў, — зазначае дырэктар прадпрыемства Вiктар Капiтанаў. — Цалкам была праведзена цеплавая рэабiлiтацыя, поўны рамонт канструкцый, усе работы па ўнутранай аддзелцы памяшканняў, добраўпарадкаванню тэрыторыi. У кватэрах стаiць кацёл ацяплення, таму рэгуляваць тэмпературны рэжым у кватэрах кожная сям’я можа iндывiдуальна.

Паводле слоў намеснiка старшынi Смалявiцкага раённага выканаўчага камiтэта Васiля Цурыкава, з’яўленне новых дзесяцi кватэр дазволiла зняць праблему жылля для сацыяльна незабяспечанага насельнiцтва рэгiёна.

— Ужо праз месяц мы пачынаем будаваць новае жыллё. Справа ў тым, што ў Смалявiчах засталiся драўляныя дамы барачнага тыпу, якiя ўзведзены яшчэ ў пачатку трыццатых гадоў, — кажа Васiль Цурыкаў. — Зразумела, што людзям трэба паляпшаць жыллёвыя ўмовы, таму будаўнiцтва жылля будзе працягвацца, пакуль патрэба ў паляпшэннi ўмоў не знiкне ўвогуле. У мiнулым годзе новыя кватэры атрымалi i жыхары некаторых вёсак, а таксама аграгарадка.