Пад Лагойскам пасялiўся «Мамант»

Источник материала:

Прыгожае жыццё

Адкрыецца перад’юбiлейны «Мамант» 25 мая ў забаўляльным цэнтры «Калiзей» шоу бодзi-арту. Паказ пройдзе на вышэйшым узроўнi i па еўрапейскiх правiлах. Гэта значыць, што эскiзы нацельных малюнкаў прайшлi папярэднi адбор журы, а наносiцца бодзi-арт будзе непасрэдна перад публiкай. Мала таго — размаляваная мадэль павiнна не проста паказаць малюнак з усiх бакоў, а зрабiць суцэльны нумар-прэзентацыю. Улiчваючы, што шоу будзе суправаджацца паказам найбольш экстравагантных мадэляў самога конкурсу «Мамант» i выступленнем зорак беларускай эстрады, бодзi-арт абяцае стаць цi не самай уражлiвай часткай фестывалю.

Асноўны дзень — 26 мая — прысвечаны паказу больш як 30 конкурсных «авангардна-модных» калекцый маладых дызайнераў, адабраных не абы-кiм, а Iванам Айплатавым. Зрэшты, акрамя ўласна паказу, прыкладна з 18 гадзiн у спартыўным комплексе «Лагойск» разгорнецца музычна-вiдовiшчная праграма: паказ новых распрацовак пластычнага тэатра «Iнжэст», перформансы, выступленнi балетаў «Candy Man» i «Pop’s Fundation», а таксама Corrian’ы, Галiны Шышковай, Пятра Елфiмава, Палiны Смолавай. Палiна, дарэчы, увогуле выступае сёлета «тварам фестывалю», i на сцэну ёй давядзецца выходзiць не адзiн раз, прычым у якасцi мадэлi: адразу некалькi дызайнераў шыюць адзенне спецыяльна для яе. Скончыцца праграма вялiкай вечарынкай пад адкрытым небам «After MAMOHT Party» — з танцавальным шоу i феерверкам.

27 мая, у заключны дзень фестывалю, зноў жа ў забаўляльным цэнтры «Калiзей» адбудзецца закрытая вечарынка з паказам лепшых калекцый, падвядзеннем вынiкаў i раздачай сланоў... прабачце, «Мамантаў» пераможцам. «Маманты», якiмi арганiзатары — часопiс «РиО», рэсурс www.belarustoday.info i ДСАК «Лагойск» — вырашылi замянiць ранейшыя прызы — «Залатыя iклы» — гэта насамрэч залатыя бiрулькi, выкананыя пад заказ вядомай ювелiрнай фiрмай. Да iх прыкладаюцца грашовыя ўзнагароды: тры прызы па 1 тысячы долараў ЗША для пераможцаў у намiнацыях «Лепшы касцюм» (ацэньваецца якасць), «Лепшая калекцыя» (арыгiнальнасць iдэi) i «Лепшая прэзентацыя» (увесь паказ). Мадэльер, якi атрымае лепшы вынiк ва ўсiх намiнацыях, будзе ўзнагароджаны Гран-пры ў памеры двух тысяч долараў i адмысловай статуэткай «Мамант» (каштуе каля 700 долараў).

Цiкавiцеся, а суддзi хто? «Журыць» канкурсантаў сёлета прыедзе дырэктар маскоўскага Тыдня моды Генадзь Яшчук, дызайнерскiя дуэты «Калейдаскоп» (Вялiкабрытанiя) i «Дзве сарваныя вежы» (Расiя), авангардны мастак Андрэй Барценеў i знакамiтая шляпнiца Вiялета Лiтвiнава, а таксама дызайнер Iван Айплатаў, дырэктар вiцебскага фэсту «Белая амфара» Марына Раманоўская i скульптар Уладзiмiр Жбанаў.

Шкада, канешне, што знiкла арыгiнальная традыцыя кожны год называць калекцыi на пэўную лiтару алфавiта (дайшлi, калi не памыляюся, да лiтары «Ё»), дый некаторыя iншыя «фiшкi», якiя i рабiлi фестываль сапраўды авангардным. З другога боку, выдатна, што «Мамант» увогуле адрадзiўся пасля перапынку ў 2002—2004 гадах. Ды не проста адрадзiўся, а пашырыўся з выключна моднай тусоўкi ў фестываль авангарднага мастацтва. Арганiзатары спадзяюцца, што ў юбiлейным «Маманце» будуць не толькi модныя паказы, але i выстава авангардных мастакоў, i канцэрт альтэрнатыўнай музыкi... Магчыма, на дапамогу прыедзе з Масквы i «тата» — заснавальнiк фестывалю Юрый Брэус.