На дапамогу спадзявайся, але i сам не спi

Источник материала:

АДРАСЫ ВОПЫТУ

Паводле слоў начальнiка ўпраўлення адукацыi Гродзенскага аблвыканкама Аляксандра Сягоднiка, такi рэгiянальны дакумент распрацаваны ўпершыню. Праграма ахоплiвае ўсю сiстэму адукацыi вобласцi, пачынаючы з дашкольных устаноў, i пры гэтым галоўным прыярытэтам яе з’яўляецца выхад на канкрэтнага школьнiка — асобу, якая павiнна атрымаць адукацыю згодна са сваiмi здольнасцямi i запатрабаваннямi бацькоў.

Генадзь УЛАДЫКА, дырэктар Дзiтвянскай сярэдняй школы (з лiцэйскiмi класамi для адораных дзяцей з сельскай мясцовасцi):

— У сельскай школе нельга стварыць шмат профiляў адукацыi па ўсiх напрамках, каб улiчыць асаблiвасцi кожнага вучня. Таму мы каля трох гадоў назад хадайнiчалi перад упраўленнем адукацыi аб арганiзацыi на базе школы профiльных лiцэйскiх класаў фiзiка-матэматычнага i хiмiка-бiялагiчнага накiрунку, з улiкам нашага кадравага i тэхнiчнага патэнцыялу. Нас падтрымалi. Распрацавана вучэбна-метадычная i нарматыўная дакументацыя, з дапамогай выканкама абнавiлi сваю матэрыяльную базу, рэканструявалi iнтэрнат i цяпер на базе школы маем лiцэйскiя i профiльныя класы для навучэнцаў з сельскай мясцовасцi ўсяго Лiдскага раёна.

У нас заключаны дагаворы з выкладчыкамi БНТУ i лiцэя БДУ. Паралельна школа з’яўляецца рэспублiканскай эксперыментальнай пляцоўкай па апрабаванню тэхналагiчнай мадэлi старшай ступенi сярэдняй адукацыi. Сутнасць эксперымента ў тым, каб максiмальна разгрузiць вучняў 10 i 11 класаў ад базавых няпрофiльных прадметаў. Гэта не значыць, што мы павiнны пазбавiцца ад часткi гэтых прадметаў — не, яны iнтэгруюцца ў пэўныя курсы, каб, не пагоршыўшы якасць адукацыi, «зэканомiць» старшакласнiкам час для падрыхтоўкi для тэсцiравання.

Генадзь Анатольевiч запрасiў дэпутатаў абласнога Савета ў камп’ютарны клас, дзе вучнi якраз праходзiлi тэсты па матэматыцы.

У гэтым класе, дарэчы, да паслуг усiх жадаючых i па ўзгадненню з падатковай iнспекцыяй дзейнiчае камп’ютарны клуб, але, зазначае дырэктар школы, у разумных межах: дзве гадзiны ў дзень. Атрыманыя грошы (бiлет на сённяшнi дзень каштуе 500 рублёў) iдуць на спецрахунак школы. Папаўняюць яго i сродкi ад рэалiзацыi пасцельнай бялiзны ўласнай вытворчасцi — дзякуючы швейным машынкам, якiя падораны спонсарамi. У цэлым школа зарабляе за год каля 6-7 мiльёнаў рублёў, накiроўваючы грошы на аплату свайго электраспажывання i новае абсталяванне.

Iван УРБАНОВIЧ, намеснiк начальнiка ўпраўлення адукацыi Гродзенскага аблвыканкама:

— Сiстэма прафесiйна-тэхнiчнай адукацыi Гродзеншчыны (30 навучальных устаноў, у тым лiку 7 каледжаў) сёння рыхтуе спецыялiстаў па 84 квалiфiкацыях. Гiбка рэагуючы на рынак працы, у гэтым навучальным годзе выключылi з пералiку прыёму 16 квалiфiкацый, але затое адкрыта падрыхтоўка кадраў па 14 новых спецыяльнасцях. У прыватнасцi, па просьбе МНС вядзецца падрыхтоўка аператараў выязных брыгад. Звярнуўся «Белдзяржстрах» — наладжана навучанне страхавых агентаў.

Галоўная праблема — матэрыяльна-тэхнiчная база: асноўныя фонды прафесiйных сельскiх вучылiшчаў зношаны на 80—90 працэнтаў, станочны парк i абсталяванне ў прамысловых ПТВ — на 70—80 працэнтаў. Мясцовыя ўлады iдуць насустрач. Установы прафтэхадукацыi атрымалi 15 трактароў новых мадэляў, 2 камбайны «Лiда-1300». Сёлета згодна з рашэннем аблвыканкама будзе закуплена 29 адзiнак сельскагаспадарчай тэхнiкi з бязвыплатнай перадачай яе ў аператыўнае кiраванне прафесiйна-тэхнiчным навучальным установам. Сёння, умацоўваючы базу сельскiх ПТВ, акцэнт трэба ўжо рабiць на прамысловыя. Iх кадры, у прыватнасцi па металаапрацоўцы, цяпер запатрабаваныя на сто працэнтаў.

Другая праблема — забеспячэнне гэтых устаноў сродкамi навучання, i ў першую чаргу — тэхнiчнай лiтаратурай. Уся выдавецкая база пасля распаду СССР засталася ў Расii. Зноў жа разлiчваем на добры жэст з боку мясцовай улады, як гэта было ў 2000 годзе, калi ў азнаменаванне 60-годдзя сiстэмы прафтэхадукацыi кожная навучальная ўстанова атрымала камп’ютарны клас, i, акрамя таго, мы набылi ў Расii 12 тысяч экзэмпляраў тэхнiчнай лiтаратуры.

Зрэшты, на дапамогу, як кажуць, спадзявайся, але i сам не спi ў шапку. Паводле iнфармацыi Iвана Урбановiча, летась ад рэалiзацыi сваёй прадукцыi ўстановы прафтэхадукацыi вобласцi атрымалi 3 мiльярды 800 мiльёнаў рублёў, план на гэты год — 4,5 мiльярда рублёў. Грошы iдуць на ўмацаванне ўласнай вучэбна-матэрыяльнай базы. Калi сельскiя ПТВ у сярэднiм за год выкарыстоўваюць 80—90 тон гаруча-змазачных матэрыялаў, то за кошт бюджэту набываецца максiмум 10 тон, а астатняе зарабляюць самi.

На сённяшнi дзень рознымi тыпамi камп’ютарнай тэхнiкi аснашчаны 91,3 працэнта сярэднiх i базавых школ, у тым лiку сучаснай тэхнiкай — 70,9 працэнта. 220 школ i ўсе прафесiйна-тэхнiчныя ўстановы маюць доступ у Iнтэрнэт. Да 1 верасня гэтага года для школ будзе закуплена яшчэ 45 камп’ютарных класаў i, акрамя таго, трэба зрабiць упор на iх аснашчэнне спартыўным iнвентаром. На працягу гэтага i наступнага гадоў мяркуецца забяспечыць стопрацэнтны ахоп вучняў профiльнай адукацыяй на старшай ступенi агульнаадукацыйнай школы.

Будуць прымацца меры па арганiзацыi жыллёва-будаўнiчых кааператываў для педагогаў, выдзяленню iм iльготных крэдытаў, прадастаўленню маладым спецыялiстам, якiя працуюць у сферы адукацыi ў сельскай мясцовасцi, аднаго з пяцi жылых дамоў, што ўзводзяцца ў сельскагаспадарчай арганiзацыi.

Сесiя абласнога Савета дэпутатаў даручыла фiнансаваму ўпраўленню аблвыканкама забяспечыць своечасовасць, перыядычнасць i паўнату аб’ёмаў фiнансавання Праграмы развiцця сiстэмы адукацыi Гродзенскай вобласцi на 2005—2010 гады. Свае рэгiянальныя праграмы даручана зацвердзiць Гродзенскаму гарадскому i раённым саветам дэпутатаў.