Аўтааматар

Источник материала:

КАМПЛЕКТ АПТЭЧКI

Я не прайшоў тэхагляд толькi з-за таго, што ў маiм аўтамабiлi была разукамплектавана аптэчка. Зараз трэба сабраць неабходны асартымент i не ведаю, што павiнна ўваходзiць у камплект вадзiцельскай аптэчкi?

Iлля Кошкiн, г. Барысаў

Пералiк лекаў, прэпаратаў i iншых прылад, якiя павiнны ўваходзiць у камплект вадзiцельскай аптэчкi, зацверджаны загадам Мiнiстэрства аховы здароўя ад 15.11.1999 года № 341.

Такiм чынам, у вадзiцельскай аптэчцы павiнны быць: анальгiн 0,5 №6 (10), ацэтылсалiцылавая кiслата 0,5 №6 (10), партатыўны гiпатэрмiчны (ахалоджваючы) пакет, раствор сульфацыла-натрыя, жгут для спынення артэрыяльнага кровацячэння з дазiраванай кампрэсiяй для самадапамогі, бiнт медыцынскi стэрыльны ( 5х10 см ), бiнт медыцынскi нестэрыльны ( 5х10 см), бiнт медыцынскi нестэрыльны ( 5х5 см), сурвэткi стэрыльныя, альтэкс з фурагiнам — для спынення капiлярнага i вянознага кровацячэння, атраўматычныя, антымiкробныя з гемастатычным дзеяннем, сурвэткi атраўматычныя, альтэкс з хлоргексiдынам, лейкапластыр бактэрыцыдны i звычайны, ёд або раствор брыльянтавы зялёны, бiнт эластычны нестэрыльны, вата гiграскапiчная нестэрыльная 50 г, нiтраглiцэрын 0,0005 № 40 або № 20, валiдол 0,06 № 10, прылада для правядзення штучнага дыхання, раствор амiяку, актывiраваны вугаль або энтэрадэз (парашок), карвалол, нажнiцы, пальчаткi медыцынскiя, прэзерватывы — 3 штукi.

Аўтабяспека

БЕРАЖЫЦЕ ДЗЯЦЕЙ

З пачатку года ў нашай краiне ў вынiку дарожна-транспартных здарэнняў (ДТЗ) загiнулi 19 дзяцей, а 148 хлопчыкаў i дзяўчынак атрымалi траўмы.

Як адзначыла старшы iнспектар упраўлення Дзяржаўтаiнспекцыi МУС Ганна Банадык, у днi школьных канiкулаў праблема дзiцячага траўматызму з’яўляецца найбольш актуальнай. Таму 26 мая, пасля заканчэння ў школах вучэбнага года, Дзяржаўтаiнспекцыя правядзе адзiны дзень бяспекi дарожнага руху пад красамоўнай назвай «Дзецям — дарожную бяспеку!»

ПЕШАХОДЫ ПАД КОЛАМI

За першы квартал гэтага года ў Беларусi зарэгiстравана 1756 дарожна-транспартных здарэнняў, у вынiку якiх 332 чалавекi загiнулi i 1834 — атрымалi раненнi.

Як паведамiла старшы iнспектар упраўлення Дзяржаўтаiнспекцыi МУС Беларусi Лiлiя Комар, самымi распаўсюджаннымi ДТЗ з’яўляецца наезд на пешаходаў i сутыкненне транспартных сродкаў. У перышм квартале зарэгiстравана адпаведна 894 ( 51 працэнт ад агульнай колькасцi) i 523 ( 30 працэнтаў) такiх аварый.

Аўтапаркоўка

НЕАБГРУНТАВАНЫЯ ПАБОРЫ

Мiнская мiлiцыя правяла праверкi месцаў паркоўкi аўтамабiляў.

«Рэвiзii» былi праведзены на 97 паркiнгах. Як высветлiлася, у 9 месцах аплата бралася з вадзiцеляў незаконна. Увогуле, як адзначыў намеснiк начальнiка мiлiцыi грамадскай бяспекi сталiчнага ГУУС Яўген Полудзень, на месцах платнай паркоўкi павiнна быць ахова транспартных сродкаў. У адваротным выпадку плата за паркоўку бярэцца незаконна.

Аўтаiнфарм

УСЕ НА АЎТАСАЛОН!

Сёння ў сталiчным Футбольным манежы ў 11 гадзiн 15 хвiлiн адкрываецца выстава-кiрмаш «Мiнскi аўтасалон».

У першы дзень аўтасалон могуць наведаць толькi ўладальнiкi VIP-бiлетаў, кошт якiх складае 25 тысяч рублёў.

25—26 мая аўтасалон будзе працаваць з 11 да 21 гадзiны, а 27—28 мая — з 10 да 21 гадзiны. Бiлеты для дарослых у звычайныя днi будуць каштаваць 10 тысяч рублёў, для дзяцей ва ўзросце ад 8 да 14 гадоў — 5 тысяч рублёў.

Аўтапрам

ТАННАЯ, АЛЕ ПРАЦАВIТАЯ

Iндыйская кампанiя Tata плануе пабудаваць завод па вытворчасцi таннага аўтамабiля коштам 2—3 тысячы долараў. Яго будуць рабiць з пластыку.

Прычым элементы кузава будуць склейваць памiж сабой. Пад капотам пластыкавага аўто будзе рухавiк магутнасцю ўсяго 1 лiтр, здольны развiць хуткасць не больш за 100 кiламетраў у гадзiну. Праўда, вытворцы танных аўто абяцаюць, што такiя машыны змогуць перавозiць 5 пасажыраў i вялiкую колькасць грузаў.

Аўтажарт

Ноччу двое нецвярозых мужчын лiтаральна заносяць у бар трэцяга, ушчэнт п’янага сабутэльнiка, уладкоўваюцца за стойкай i крычаць:

— Бармен, нам па сто грамаў гарэлкi, а нашаму сябру мiнеральнай вады, ён — за рулём.

Рубрыку вядзе Мікола ДЗЯБЁЛА.