На «ўсю Iванаўскую»

Источник материала:

На свяце вулiцы, арганiзаваным па iнiцыятыве кiраўнiка адмiнiстрацыi Савецкага раёна Таццяны Фiлiмончык, панавала цёплая атмасфера. Уразiў майстэрствам духавы аркестр мясцовых выратавальнiкаў з раённага падраздзялення Мiнiстэрства надзвычайных сiтуацый.

У дзiцячым гарадку можна было ўбачыць герояў казак, наведаць карцiнную галерэю, падзiвiцца на вырабы з бiсеру... Важна, нiбы павы, праходзiлi дзяўчаты ў старадаўнiх славянскiх касцюмах, а крыху далей «не на жыццё, а на смерць» змагалiся сярэднявечныя рыцары ў даспехах. Iх змянялі «сучаснiкi» з паказальнымi выступленнямi рукапашнага бою.

На спецыяльную веласiпедную трасу выйшлi каля ста хлапчукоў i дзяўчынак да сямi i больш гадоў. А самаму малодшаму было ўсяго тры.

Урачыста адкрылася падчас свята арыгiнальная скульптурная кампазiцыя «Гарадскiя кветкi», якая i восенню, i зiмой, i вясной будзе дарыць гараджанам прыгажосць i напамiнаць iм аб водарах лета. Адметна, што аўтарам яе з’яўляецца трэцякурснiца Гомельскага мастацкага вучылiшча Кацярына Балдасенка, якая заняла першае месца ў конкурсе эскiзных праектаў па добраўпарадкаванню Савецкага раёна сярод архiтэктурных i дызайнерскiх спецыяльнасцяў. Яе творчая фантазiя сапраўды ўразiла многiх.

На свяце вулiцы ўшанавалi лепшага настаўнiка, участковага мiлiцыянера, паштальёна, урача, дворнiка, павiталi самую маладую сям’ю i самага старога жыхара вулiцы (96 гадоў), уручылi пашпарты маладым людзям, якiя дасягнулi паўналецця.

Засталося дадаць, што для правядзення свята жыхары раёна працавалi на суботнiку (бюджэтныя грошы на свята задзейнiчаны не былi). Дарэчы, многiя, жывучы на адной вулiцы, не ведалi адзiн аднаго, а тут — пазнаёмiлiся i цяпер, напэўна, будуць падтрымлiваць сяброўскiя сувязi. I яшчэ: у адмiнiстрацыю раёна ўжо звяртаюцца жыхары iншых вулiц: а калi ў нас будзе такое свята?