Чатыры на чатыры

Источник материала:

Наш фармат

У савецкi час на тэлебачаннi iснавала праграма «Савецкi Саюз вачамi замежных гасцей». Новы тэатральны праект з удзелам Андрэя Курэйчыка выклiкае пэўныя асацыяцыi... Толькi ў дадзеным выпадку мы адчуем, што значыць Беларусь у вачах маладых замежных драматургаў.

Iх будзе чацвёра i разам яны наведаюць чатыры гарады — Лондан, Берлiн, Мiнск i Кампалу, што ў Афрыцы, — каб напiсаць там па п’есе. Гарады выбраны зусiм невыпадкова: iх прадстаўляе кожны з чатырох удзельнiкаў праекта. Напрыклад, Габрыэль Гбадамосi, якi выкладае ў Кембрыджскiм унiверсiтэце, будзе прадстаўляць Лондан. Давiд Лiндэман, якi быў прызнаны адным з найярчэйшых маладых драматургаў Германii, працуе ў Берлiнскiм тэатры, натуральна, будзе трымаць марку гэтага горада ў праекце. Чарльз Мулеква, драматург з Уганды, абаранiў прафесарскую дысертацыю ў адным з амерыканскiх унiверсiтэтаў, але вядзе актыўную асветную дзейнасць у краiнах Цэнтральнай Афрыкi, у тым лiку ў роднай Угандзе. I нарэшце, Андрэй Курэйчык, мiнская знакамiтасць.

Гэтая чацвёрка збярэцца разам i паедзе па чатырох вышэй названых краiнах. Пазнаёмiцца з культурай кожнай з краiн, яе людзьмi i традыцыямi. Па вынiках наведвання кожны ўдзельнiк праекта павiнен будзе напiсаць па п’есе ў кожным горадзе. Такiм чынам, Мiнску адразу будзе прысвечана чатыры п’есы, у якiх увасобiцца погляд на сталiцу Беларусi яе жыхара, а таксама брытанца, немца i афрыканца. Напэўна, мы зможам потым з iмi азнаёмiцца, таму што п’есы будуць пераведзены на чатыры мовы. Усяго за два гады, якiя будзе доўжыцца праект, яго ўдзельнiкi створаць 16 п’ес. А напрыканцы працы з гэтых шаснаццацi сумеснымi намаганнямi створыцца адна, якая будзе пастаўлена ў чатырох гарадах на чатырох мовах.

Праект пачаўся ўжо ў Лондане. Беларуса Курэйчыка найбольш прыцягвае Кампала, сталiца Уганды, якая месцiцца на беразе возера Вiкторыя, самага вялiкага ў свеце. Але тое, што мы ведаем пра Уганду, вельмi насцярожвае: краiнай апошнiя паўстагоддзя кiравалi крывавыя дыктатары, некаторых з якiх нават папракалi ў канiбалiзме. Людаеды i цяпер ёсць сярод паўстанцаў Уганды, якiя кантралююць частку краiны. I вось сюды з Еўропы з’язджаюцца драматургi ажно на два тыднi! Сапраўды, мастацтва патрабуе ахвяр...

Тым больш дзiўна, што ва Угандзе ёсць людзi, якiя займаюцца мастацтвам. Наколькi яна натхнiць еўрапейцаў мы таксама даведаемся. Як даведаемся i пра тое, чым здзiвiць нашых гасцей стабiльная Беларусь.