Колькi спiрту вытрымае печань?

Источник материала:

Карысная парада

— Наша здароўе напрамую залежыць ад стану стрававальнай сiстэмы, якасцi i колькасцi ўжытых прадуктаў, перыядычнасцi прыёму ежы, асаблiвасцяў ператраўлiвання i засваення. Пажыўныя рэчывы, якiя трапляюць у арганiзм, ператраўлiваюцца з дапамогай ферментаў, што выпрацоўваюцца ў ротавай поласцi, страўнiку, кiшэчнiку, падстраўнiкавай залозе i печанi. Паўнацэннае харчаванне клетак залежыць ад эфектыўнасцi работы ферментаў. Пераяданне сур’ёзна шкодзiць нармальнаму засваенню прадуктаў харчавання. Частка нерасшчэпленых ферментамi прадуктаў справакуе працэсы бражэння i гнiення. Рэчывы, якiя пры гэтым будуць выпрацоўвацца, пачнуць раздражняць сценкi кiшэчнiка, што можа прывесцi да дыярэi цi, наадварот, запору. Калi страўнiк не можа своечасова выслабанiцца, ён таксама раздражняецца, з павышанай нагрузкай функцыянуюць падстраўнiкавая залоза i жоўцевыводзячая сiстэма.

Зараз здаровым людзям рэкамендуецца ўжываць ежу не менш за 3—4 разы на дзень, а схiльным да павелiчэння вагi — нават часцей. Есцi трэба пакрысе, i памятаць, што сытным можа быць сняданак, а вячэра — лёгкай.

Пiць ваду лепей перад ежай, паколькi ў пустым страўнiку вада не затрымлiваецца. У запоўненым страўнiку вада знiжае канцэнтрацыю ферментаў ператраўлiвання i запавольвае страваванне. Памятайце, што мяса, асаблiва тлустае, знаходзiцца ў страўнiку на працягу 4—6 гадзiн, нятлустыя рыбныя стравы — 3—4, хлеб, садавiна, кашы — 2—3 гадзiны.

Лiчыцца, што здаровая печань дарослага чалавека здольна перапрацаваць за суткi без узнiкнення незваротных змяненняў 40 грамаў этылавага спiрту — 0,5 лiтра пiва, або 0,3 лiтра вiна, або 100 мiлiлiтраў гарэлкi цi каньяку. Аднак iндывiдуальная мяжа можа быць i больш нiзкай. Для жанчын i людзей ва ўзросце пасля 65 гадоў наогул iснуе абмежаванне 20 грамамi этылавага спiрту.

За адну гадзiну арганiзм у стане нейтралiзаваць толькi 7 грамаў спiрту, так што той, хто выпiў 2 лiтры пiва цi лiтр вiна, здольны працверазець не раней чым праз 10 гадзiн. Аматарам пiва варта ведаць, што гэты напой правакуе ўзнiкненне смагi, з-за чаго, як правiла, i перавышаюцца нормы яго ўжывання. Спiртныя напоi варта чаргаваць з вадой, натуральным сокам цi тонiкам.

Запiсала Святлана БАРЫСЕНКА.