Першыя беларускiя праекты фiнансуюцца Праграмай малых грантаў Глабальнага экалагiчнага фонду i ПРААН

Источник материала:

Праграма малых грантаў ГЭФ/ПРААН накiравана на падтрымку грамадскiх iнiцыятыў, якiя садзейнiчаюць паляпшэнню экалагiчнай сiтуацыi. Праграма прадугледжвае выдзяленне грантаў памерам да 50 тыс. долараў ЗША няўрадавым арганiзацыям i мясцовым грамадскiм аб’яднанням, якiя займаюцца пытаннямi аховы навакольнага асяроддзя. З 1992 года ў рамках праграмы фiнансавая падтрымка была аказана экалагiчным праектам у больш чым 90 краiнах свету.

Iнiцыятары праекта па развiццю экалагiчна чыстай сельскагаспадарчай вытворчасцi ў Нацыянальным парку «Нарачанскi» (грамадскае аб’яднанне «Жанчыны за адраджэнне Нарачанскага краю») плануюць стварыць у рэгiёне мадэль экалагiчна чыстай фермы на плошчы ў 20 гектараў. Зрабiць гэта плануецца на базе Свiрскага сельскагаспадарчага лiцэя.

Мiжнароднае грамадскае аб’яднанне «Экасфера» плануе ажыццявiць пераўпакоўку ў спецыяльную тару i размяшчэнне ў новых складскiх памяшканнях каля 200 тон непрыдатных пестыцыдаў, якiя сёння захоўваюцца ў Барысаўскiм раёне ў неналежных умовах (што стварае пагрозу для навакольнага асяроддзя i здароўя мясцовых жыхароў).

Як адзначыла падчас цырымонii падпiсання дагавораў прадстаўнiк ААН/ПРААН у Беларусi Джыхан Султанаглу, ажыццяўленне праектаў у рамках Праграмы малых грантаў у iншых краiнах прадэманстравала, што нават пры невялiкiм фiнансаваннi мясцовыя супольнасцi здольныя ажыццяўляць праекты, якiя прыводзяць да значных пазiтыўных змен у жыццi мясцовага насельнiцтва i адначасова ўносяць уклад у глабальнае захаванне навакольнага асяроддзя. Паводле слоў першага намеснiка мiнiстра прыродных рэсурсаў i аховы навакольнага асяроддзя Беларусi Аляксандра Апацкага, рэалiзацыя Праграмы малых грантаў у Беларусi «адпавядае нацыянальным iнтарэсам краiны».