Касiў Ясь... мак i казаў бабулi так...

Источник материала:

На ўборцы — міліцыя

Нiчога сабе самасейка: ажно два пуды каробачак маку выраслi на зямельным участку старой! Вядома ж, мiлiцыянерам давялося нямала пралiць поту, каб выкасiць злашчасныя раслiны i знiшчыць iх.

Другая жанчына з вёскi Пакалюбiчы Гомельскага раёна i яе
19-гадовы сын вырошчвалi не просты, а маслянiсты мак на дзвюх сотках свайго агарода за высокай агароджай з кукурузы. I каб нiхто не залез у яго i не пажывiўся, ноччу сцераглi гэтыя ўгоддзi, узброiўшыся газавым пiсталетам. Ураджай таго маку быў адмысловы: без двух кiлаграмаў сем пудоў макавых галовак! Сям’я спрабавала збыць часткамi гэты зялёны дурман, ды, як кажуць, засвяцiлася, а ў вынiку наперадзе — лава падсудных.

З бензакосамi прайшлася мiлiцыя i па яру, якi знаходзiцца каля вёскi Радуга Веткаўскага раёна, дзе на плошчы ў 200 квадратных метраў выраслi каноплi. Дзесяць пудоў сцяблiн было пушчана на дым. А вось за фермай вёскi Белае Балота Рэчыцкага раёна мiлiцыя ў ход бензакосы пусцiць не адважылася, бо работа была б неэфектыўнай: дзiкарослыя каноплi — мара наркадзялкоў — буялi амаль на гектары зямлi. Таму тут прымянiлi сельскагаспадарчую тэхнiку, якая падчас касьбы чатырох тон наркасыравiны «з’ела» 200 лiтраў дызельнага палiва.

Як паведамляе кiраўнiк прэс-службы ўпраўлення ўнутраных спраў Гомельскага аблвыканкама Iгар Грышкевiч, «макавая ўборка-2006» сiламi мiлiцыi працягваецца. А па выяўленых фактах праводзяцца адпаведныя расследаваннi, узбуджаюцца крымiнальныя справы.