Пасля жнiва — у санаторый

Источник материала:

Мiншчына ўпэўнена вядзе адлiк другому мiльёну свайго сёлетняга караваю. Створаны ўсе перадумовы для таго, каб рэгiён намалацiў самы «важкi» хлеб. Падчас жнiва традыцыйна ў лiдарах Слуцкi, Капыльскi, Нясвiжскi раёны — яны збiраюць значную частку агульнага ўраджаю. Аднак i iншыя тэрыторыi, якiя дасюль лiчылiся не зусiм перспектыўнымi, апошнiм часам паступова набiраюць тэмпы...

Да лiку такiх смела можна аднесцi Мядзельскi раён. Глебы тут не надта ўрадлiвыя. Аднак нават у гэты, не зусiм спрыяльны для хлебаробаў год, на Мядзельшчыне ўдалося не толькi дасягнуць леташняга ўзроўню па намалотах, а нават на 10 працэнтаў яго пераўзысцi. Зараз на жнiве ў гаспадарках раёна працуюць 118 камбайнаў. Збожжаўборачная тэхнiка абноўлена амаль на трэць — сёлета па лiзiнгу ўзялi 35 машын (як айчыннай вытворчасцi, так i расiйскiх «Донаў»). Нагрузка на камбайн адразу зменшылася да 140 гектараў. Абнавiлi i сушыльную гаспадарку (дарэчы, у раёне зараз усе збожжатакi пераведзены на выкарыстанне мясцовых вiдаў палiва — адпаведна, затраты зменшылiся).

Агульны клiн збожжавых i зернебабовых Мядзельшчыны складае каля 18 тысяч гектараў. Сёлета ў раёне плануюць атрымаць каля 40 тыс. тон збожжа.

— Мы разлiчвалi на больш значны «каравай», — заўважае старшыня Мядзельскага райвыканкама Iван Муха, — хлеб на палетках добры праглядаўся. Аднак нездарма кажуць, што мы знаходзiмся ў зоне рызыкоўнага земляробства: падчас выспявання каласоў засушыла, а зараз з-за дажджоў i моцнага ветру ўборачныя работы ўскладняюцца.

Жнiво выдалася складаным: здаралася, што пераганялi камбайны з гаспадаркi ў гаспадарку — туды, дзе на той час не было дажджу i можна выходзiць у поле. Паводле слоў першага намеснiка старшынi Мядзельскага райвыканкама Аляксандра Данiленкi, выкарыстоўвалi i сцеблапад’ёмнiкi, раздзельную ўборку розных участкаў. Карацей кажучы, усе варыянты.

На палетках сельскагаспадарчага вытворчага кааператыва «Свiрскi край» удалося пабачыць даволi нязвыклую карцiну — касцоў, якiя хадзiлi побач з камбайнамi i дапамагалi апрацоўваць «праблемныя» ўчасткi. «Дзе-нiдзе так скруцiла збажыну, што i не дабрацца, — дзялiўся набалелым старшыня СВК «Свiрскi край» Генадзь Юхно. — А трэба сабраць усё, да апошняга каласка, не пакiдаць жа частку ўраджаю на полi прападаць». I так страты з-за капрызаў надвор’я гаспадарка панесла — планавалi малацiць па 35—40 цэнтнераў з гектара, а зараз дзесьцi па 23 выходзiць. Як з горыччу расказваў Генадзь Юхно, збожжа дробнае. А каб не ратавалi ўраджай самымi што нi на ёсць «дзедаўскiмi спосабамi», дык яшчэ менш атрымалi б.

Трэба лiчыць кожную капейчыну — iнакш проста не выжывеш. Гэта сапраўдная аксiёма сучаснасцi. Дзякуючы, напэўна, у тым лiку такому гаспадарскаму стаўленню ў «Свiрскiм краi» справы ладзяцца. Тры гады таму да калгаса «Свiр» было далучана адстаючае сельгаспрадпрыемства «Канстанцiнава». Першы час пасля такога аб’яднання было вельмi цяжка, затое пасля сiтуацыя змянiлася — гаспадарка выкараскалася са страт i пачала зарабляць грошы. Асноўная крынiца паступлення сродкаў — раслiнаводства (збожжа, бульба, гароднiна). Таму тут, без перабольшвання, кожны дзень зараз год кормiць. I людзi iмкнуцца добра працаваць. «Умовы аплаты ў нас добрыя, — лiчыць Генадзь Юхно. — Падчас уборкi можна атрымаць добры заробак. Канешне, пры той умове, што з заданнем спраўляешся. Аплата напрамую звязана з якасцю».

— У людзей сёння ёсць жаданне працаваць. Ёсць за што, — лiчыць Аляксандр Данiленка. — Падчас жнiва сёлета i па 100—150 тысяч рублёў у дзень у механiзатараў выходзiць. Шмат новай тэхнiкi, трохразовае гарачае харчаванне забяспечваем.

У гаспадарках Мядзельскага раёна людзi, якiя занятыя на жнiве, дадаткова бясплатна атрымлiваюць збожжа i сена. Акрамя таго, сельгаспрадпрыемства поўнасцю забяспечвае апрацоўку iх прысядзiбных участкаў. Робiцца ўсё дзеля таго, каб у чалавека, умоўна кажучы, падчас, напрыклад, жнiва не балела галава аб уласным падворку. I ён быў упэўнены, што гаспадарка заўсёды прыйдзе на дапамогу.

— Таксама, калi механiзатар належным чынам спраўляецца з усiмi сваiмi абавязкамi, то яму бясплатна выдзяляецца пуцёўка на аздараўленне ў нашыя здраўнiцы, — кажа Аляксандр Данiленка. — Так што пасля ўборкi можна i ў санаторыi адпачыць.