У новым пасажырскiм МАЗе будуць нiзкiя ступенi i мадэрнiзаваны салон

Источник материала:

Навiнка падобная на звычайны гарадскi аўтобус зялёнага колеру, якi некалькi гадоў таму пачаў курсаваць па вулiцах. Але толькi на першы погляд. Малодшы брат не такi доўгi, пасажырскiх месцаў у iм толькi семдзесят:

— Мы распрацоўвалi аўтобус з тым улiкам, што ён будзе прыдатны для розных мэтаў. Напрыклад, у вялiкiм горадзе мадэль можа замянiць маршрутныя таксi, дазволiць разгрузiць аўтапаркi. «Вялiкiя» аўтобусы будуць працаваць у час пiк, а ў астатнюю частку дня па вулiцах могуць ездзiць нашы мадэлi, — паведамляе намеснiк галоўнага канструктара Васiль Уладыцкi. — Для маленькiх гарадоў МАЗ-206 iдэальны, таму што праходзiць па любой мясцовасцi. Па жаданню заказчыка ў аўтобусе можа быць любая камплектацыя. Напрыклад, па стандарту бiзнэс-класа, з кандыцыянерам, утульным салонам, рухавiком любой вытворчасцi. Я думаю, турыстычныя кампанii, калектывы прадпрыемстваў пажадаюць набыць навiнку.

Але i базавая камплектацыя аўтобуса адрознiваецца ад мiнулых узораў. Што, напэўна, самае галоўнае для гарадскiх пасажыраў — гэта нiзкая падлога. Пры ўваходзе ў цэнтральныя дзверы аўтобуса прыступка можа апускацца i падымацца. Такiм чынам, пенсiянеры, пасажыры на iнвалiдным крэсле без праблем змогуць заходзiць у салон. Дарэчы, i спецыяльныя месцы таксама прадугледжаны. На ўсялякi выпадак каля дзвярэй са знешняга боку ёсць кнопка сувязi з вадзiцелем.

Паводле слоў начальнiка ўпраўлення продажу пасажырскай тэхнiкi Аляксандра Хамiцэвiча, прадавацца аўтобус МАЗ-206 будзе прыблiзна за 70—80 тысяч долараў. Па суадносiнах «кошт—якасць» — гэта адна з самых даступных мадэляў у Еўропе. Ды i iншыя навiнкi таксама не горшыя. Новыя грузавыя аўтамабiлi могуць перавозiць большыя па аб’ёму грузы, пры захаваннi ўсiх тэхнiчных патрабаванняў.