Рукi прэч ад летнiх канiкулаў!

Источник материала:

З просьбай растлумачыць асаблiвасцi школьнай «канiкулярнай палiтыкi» ў нашай краiне мы звярнулiся да намеснiка начальнiка ўпраўлення агульнай сярэдняй адукацыi Мiнiстэрства адукацыi Рэспублiкi Беларусь Валянцiны МАЕЎСКАЙ:

— Нi скарачаць, нi павялiчваць летнiя канiкулы ў нас цяпер немагчыма, — запэўнiла Валянцiна Леанiдаўна. — У артыкуле 33 Закона «Аб агульнай сярэдняй адукацыi» занатавана працягласць летнiх канiкулаў не менш за дванаццаць каляндарных тыдняў. Карэкцiраваць дазваляецца толькi канiкулярны час на працягу навучальнага года. Для прыкладу, у нас ёсць навучальныя ўстановы, дзе дзецi вучацца па модульнай тэхналогii, i iм, як правiла, даводзiцца ўстанаўлiваць на працягу навучальнага года свой канiкулярны графiк. Аднак нават яны не могуць парушаць санiтарныя нормы, згодна з якiмi на працягу навучальнага года павiнна быць не менш за трыццаць каляндарных канiкулярных дзён. Толькi гэтыя трыццаць дзён i дазваляецца пераразмяркоўваць. Але навучальны год распачынаецца i завяршаецца адначасова ва ўсiх агульнаадукацыйных установах. Не варта забывацца таксама, што ў школах зараз вельмi шчыльны экзаменацыйны графiк, а лiтаральна праз некалькi дзён пасля завяршэння выпускных экзаменаў у краiне «стартуе» прыёмная кампанiя са сваiм не менш шчыльным графiкам цэнтралiзаванага тэсцiравання. Таму нават размовы не можа весцiся пра тое, каб летам вялiся заняткi ў школах. Канiкулы на працягу навучальнага года ў нас «прывязваюцца» да Вялiкадня i Калядаў. У 2006/2007 навучальным годзе беларускiя школьнiкi будуць адпачываць на канiкулах усяго 33 каляндарныя днi. Да таго ж для самых маленькiх школьнiкаў (вучняў першага i другога класаў) у нас прадугледжаны ў лютым дадатковы канiкулярны тыдзень, паколькi трэцяя вучэбная чвэрць — найбольш працяглая i складаная...