Як дзецi «паглынаюць» жыллёвы крэдыт?

Источник материала:

Паводле слоў кансультанта галоўнага ўпраўлення палiтыкi занятасцi i народанасельнiцтва Мiнiстэрства працы i сацыяльнай абароны Рэспублiкi Беларусь Аляксандры ЛIСОЎСКАЙ, у гэты Год Мацi i надалей у полi зроку дзяржавы — не толькi шматдзетная сям’я. Так, працуючыя i непрацуючыя да цяжарнасцi жанчыны пачалi ўжо атрымлiваць аднолькавую дапамогу на дзяцей ва ўзросце да трох гадоў — 65 працэнтаў бюджэту пражытачнага мiнiмуму, што складае на сёння 110 240 рублёў. У далейшым гэты памер плануецца павялiчыць да 80 працэнтаў, а да 2010 года давесцi ўласна да памеру БПМ.

Што ж датычыцца менавiта шматдзетных сем’яў, дакладная колькасць якiх складае зараз 89,4 тысячы, то пры нараджэннi трэцяга i наступных дзяцей такой сям’i выплачваецца аднаразовая дапамога ў памеры трох БПМ — 508 тысяч рублёў. Для шматдзетных бацькоў удвая знiжаецца аплата за знаходжанне дзяцей у дашкольных установах, а таксама за карыстанне падручнiкамi i вучэбнымi дапаможнiкамi. Некаторым дзецям з такiх сем’яў у дашкольных установах забяспечваецца бясплатнае харчаванне або льгота пры яго аплаце.

Два гады таму шматдзетныя сем’i, якiя маюць патрэбу ў паляпшэннi жыллёвых умоў, атрымалi права на пазачарговае ўключэнне ў спiсы для атрымання льготных крэдытаў на будаўнiцтва, рэканструкцыю цi набыццё жылля, а таксама фiнансавую дапамогу ў iх пагашэннi. Апошняя залежыць ад колькасцi непаўналетнiх дзяцей. Калi iх трое, пагашаецца 30 працэнтаў ад сумы запазычанасцi, чацвёра — 50 працэнтаў, пяцёра i больш — 100.

У блiжэйшыя два гады дзяржава плануе падтрымаць i тыя маладыя сем’i, якiя пры будаўнiцтве, рэканструкцыi цi набыццi жылля карыстаюцца няльготным крэдытам. Пагашэнне крэдыту на 20 БПМ атрымае сям’я, дзе нарадзiлася цi ўжо выхоўваецца адно дзiця, на 40 БПМ — з двума дзецьмi, 50 БПМ — з трыма.