Магiлёўскi аблсавет зацвердзiў праграмы эканамiчнага i культурнага развiцця рэгiёна

Источник материала:

Праграмны момант

Новая сацыяльна-эканамiчная праграма накiравана на далейшае павелiчэнне ўзроўню i якасцi жыцця насельнiцтва, падкрэслiў з трыбуны сесii старшыня камiтэта па эканомiцы Магiлёўскага аблвыканкама Мiкалай Дудзiнскi. Яе мэты: павышэнне рэальных даходаў людзей, знiжэнне ўзроўню беспрацоўя, паляпшэнне якасных параметраў эканомiкi.

Асноўныя эканамiчныя паказчыкi, паводле праграмы, у 2010 годзе павiнны быць у сярэднiм напалову большымi ў параўнан-нi з узроўнем мiнулага года. Аб’ём iнвестыцый плануецца павялiчыць у 2 разы. На Магiлёўшчыне будуць створаны 164 аграгарадкi, а тэмпы будаўнiцтва новага жылля павiнны забяспечыць паказчык у 25 квадратных метраў у разлiку на аднаго жыхара вобласцi. Да канца новай пяцiгодкi плануецца павелiчэнне рэальнай заработнай платы на 52—58 працэнтаў да ўзроўню 2005 года. А ўзровень беспрацоўя не павiнен быць вышэйшым за 1,8—2 працэнты.

Мiкалай Дудзiнскi назваў новыя прагнозныя параметры дастаткова напружанымi: «Яны вышэйшыя, чым у мiнулай пяцiгодцы, але цалкам выконваемыя». Дэпутаты прагаласавалi за прыняцце праграмы сацыяльна-эканамiчнага развiцця Магiлёўшчыны аднагалосна.

Не выклiкала пярэчанняў у дэпутатаў i праграма захавання i развiцця культурнай сферы. Яна складаецца з некалькiх раздзелаў. Па-першае, гэта рэстаўрацыя шэрагу важнейшых гiсторыка-культурных помнiкаў Магiлёўскай вобласцi: Палаца Пацёмкiна ў Крычаве, помнiка ў гонар перамогi рускiх войскаў над шведамi ў вёсцы Лясная Слаўгарадскага раёна, палаца-паркавых ансамбляў у пасёлку Жылiчы Кiраўскага раёна i ў вёсцы Грудзiнаўка Быхаўскага раёна, Успенскага манастыра ў мястэчку Пустынкi Мсцiслаўскага раёна i Бабруйскай крэпасцi. Прывядзенне ў парадак гэтай спадчыны звязваюць з развiццём новых турыстычных маршрутаў па Магiлёўшчыне.

Культурная праграма прадугледжвае капм’ютарызацыю музейнай справы i бiблiятэк, абнаўленне iх фондаў i экспазiцый. У бiблiятэках павiнен з’явiцца Iнтэрнэт, а ў Слаўгарадскiм i Глускiм раёнах адкрыюцца новыя музеi. У новай пяцiгодцы адбудзецца рэфармаванне сельскай клубнай сiстэмы i адкрыецца больш за сотню фiларманiчных пляцовак для выступленняў артыстаў эстрады i тэатра. Мiжнародныя культурныя праекты на Магiлёўшчыне будуць развiвацца i далей.

Таксама на сесii Магiлёўскага абласнога Савета была створана камiсiя па забеспячэнню правоў ахвяр палiтычных рэпрэсiй у 1920—1980-я гады i ўвекавечанню iх памяцi. Старшыня аблсавета Уладзiмiр Панцюхоў зазначыў, што калiсьцi такая камiсiя працавала, але яе дзейнасць у 2001 годзе была прыпынена. Цяпер зноў у органы ўлады сталi звяртацца грамадзяне з лiстамi i прапановамi. Таму пасля звароту ў Канстытуцыйны Суд вырашана аднавiць работу камiсii, якая i будзе займацца справамi ахвяраў палiтычных рэпрэсiй савецкiх часоў.

Наступная сесiя абласнога Савета адбудзецца ў снежнi i будзе апошняй у гэтым склiканнi. Напярэдаднi новых выбараў у мясцовыя Саветы дэпутаты зацвердзяць прагноз сацыяльна-эканамiчнага развiцця i бюджэт Магiлёўскай вобласцi на наступны, 2007, год.