Сертыфiкат i рэгiстрацыя — залог якаснай сувязi

Источник материала:

Названыя вышэй тэлефонныя апараты, радыётэлефоны, мадэмы, факсы, аўтаадказчыкi i яшчэ некаторыя вузкаспецыяльныя ўстройствы на мове сувязiстаў называюцца аканечнымi абаненцкiмi ўстройствамi. Iх выкарыстанне рэгламентавана Законам Рэспублiкi Беларусь «Аб сувязi», Правiламi прадастаўлення паслуг мясцовымi тэлефоннымi сеткамi i дагаворам, якi заключаецца памiж абанентам i прадпрыемствам сувязi. Бадай, галоўным патрабаваннем, якое прад’яўляецца да такiх аканечных устройстваў, з’яўляецца наяўнасць у iх сертыфiката адпаведнасцi — дакумента, выдадзенага па правiлах Нацыянальнай сiстэмы сертыфiкацыi для пацвярджэння адпаведнасцi сертыфiкаванай прадукцыi ўстаноўленым патрабаванням.

— Гадоў з 10 таму краiну лiтаральна накрыла хваля несертыфiкаванай прадукцыi, доля якой дасягала 95 працэнтаў. Аканечныя ўстройствы не адпавядалi ўстаноўленым патрабаванням, што прыводзiла да нездавальняючай работы як самiх гэтых устройстваў, так i стварала пэўныя праблемы для iншых абанентаў. У першую чаргу гэта датычыла тэлефонаў з аўтаматычным вызначальнiкам нумароў, — прыгадвае Сяргей Мiкалаевiч. — Таму, каб спынiць гэтую хвалю, i была ўведзена сiстэма сертыфiкацыi.

Тэлефонныя апараты i iншыя аканечныя ўстройствы, якiя падключаюцца да ўстаноўленай разеткi, павiнны адпавядаць тэхнiчным нормам, устаноўленым для тэлефонных сетак Рэспублiкi Беларусь, i мець сертыфiкат адпаведнасцi. Грамадзяне, прадпрыемствы, установы i арганiзацыi, на iмя якiх адкрыты абанемент, нясуць адказнасць за правiльнае карыстанне тэлефонам i iншымi аканечнымi ўстройствамi, якiя ў абавязковым парадку рэгiструюцца, згодна з пiсьмовымi заявамi, на прадпрыемствах сувязi. Што гэта азначае на практыцы?

— Калi абанент пачынае карыстацца абаненцкай лiнiяй, ён павiнен прад’явiць або ў лiнейна-станцыйны цэх па месцы жыхарства, або ў нашу лабараторыю тое ж аканечнае ўстройства (тэлефонны апарат, мадэм, факс i г.д.), якiм ён збiраецца карыстацца, — тлумачыць Сяргей Баешка. — Яно павiнна мець сертыфiкат Рэспублiкi Беларусь. Пры яго наяўнасцi ў абанента, а таксама правiльна запоўненым гарантыйным талоне (хто, калi, што прадаў), само ўстройства несцi ў лiнейна-станцыйны цэх або да нас неабавязкова: органы сертыфiкацыi накiроўваюць нам пералiк устройстваў, якiя прайшлi сертыфiкацыю. Калi канкрэтная мадэль тэлефоннага апарата цi факса, напрыклад, будзе ў iм пазначана, будзе праведзена яго рэгiстрацыя.

Такiм чынам, набываючы жаданае, галоўнае — патрабаваць у прадаўца два дакументы — сертыфiкат Рэспублiкi Беларусь (ён можа быць i расiйскiм, але павiнен прызнавацца нашай краiнай) i дакумента, якi пацвярджае факт пакупкi (правiльна запоўнены гарантыйны талон). У адпаведнасцi з Правiламi прадастаўлення паслуг мясцовымi сеткамi, у выпадку выкарыстання незарэгiстраванага радыёпадаўжальнiка цi радыётэлефона, якiя ствараюць перашкоды прыёму тэлевiзiйных i радыёпраграм, тэлефон можа быць выключаны або нават закрыты абанемент. Такi крок дазваляецца рабiць у выпадку неабходнасцi прадпрыемствам сувязi, якiя прадаставiлi паслугi электрасувязi.

Апошнiя два гады ў краiне ў плане сертыфiкацыi данай прадукцыi даволi спакойная абстаноўка.

На сённяшнi дзень пэўную праблему складаюць тыя грамадзяне, якiм дораць тэхнiку з-за мяжы цi яны самi яе там набываюць.

— У гэтых выпадках нават не даводзiцца гаварыць аб нейкiх тэхнiчных характарыстыках аканечных устройстваў, iх адпаведнасцi нашым сеткам. Часам гаворка iдзе проста аб тым, каб элементарна падключыць апаратуру, бо яна не падыходзiць да нашых раз’ёмаў. Што ўжо тут гаварыць пра саму сувязь i яе якасць...