Журналiсцкае слова за дэмаграфiчную бяспеку

Источник материала:

Паводле слоў А. Косiнца, не сакрэт, што дэмаграфiчная бяспека любой дзяржавы грунтуецца на павелiчэннi нараджальнасцi, працягласцi жыцця, знiжэннi смяротнасцi, актывiзацыi мiграцыйных працэсаў. Аднак не менш важным з’яўляецца i правядзенне дасканалага ўлiку ўсiх гэтых працэсаў, у прыватнасцi, штодэкаднага збору звестак па кожнаму «пункту». Усё ж такi чалавечы рэсурс застаецца капiталам, якi забяспечвае развiццё эканомiкi, i мы не можам дапусцiць яго страты, адзначыў падчас свайго выступлення Аляксандр Мiкалаевiч.

З 1993 па гэты год колькасць нашага насельнiцтва зменшылася на 543 тысячы чалавек i на 1 студзеня склала 9 мiльёнаў 750 тысяч чалавек. Паводле прагнозных паказчыкаў, калi не прыняць неабходных мераў, у 2020 годзе Беларусь будзе насяляць 8 мiльёнаў 850 тысяч чалавек.

Колькасць насельнiцтва ва ўзросце да 15 гадоў, якая зараз складае каля 1 мiльён 595 чалавек, у 2020 годзе складзе прыкладна 1 мiльёна 269 тысяч чалавек. Ужо зараз дзецi складаюць у нас усяго 17,8 працэнта, а 20-працэнтны парог сведчыць аб надыходзе старасцi для грамадства.

З 1991 года ў краiне ўтварыўся так званы «беларускi крыж», калi смяротнасць па многiх рэгiёнах у два-тры разы перавышае нараджальнасць. У 1940 годзе, напрыклад, на 1 тысячу насельнiцтва выпадала 27 нованароджаных i 13,7 памерлых. Зараз жа на 1 тысячу чалавек прыпадае 9,2 нованароджаных i 14,5 памерлых. Паказчыкi гэтыя адрознiваюцца па абласцях, хоць у цэлым сiтуацыя застаецца адмоўнай. З дапамогай вышэйпамянёнай праграмы плануецца сцiснуць «нажнiцы», каб нараджальнасць i смяротнасць наблiзiлiся да 10—11. Дзякуючы нават першым прынятым крокам, упершыню за 12 гадоў нараджальнасць перавысiла смяротнасць у сталiцы: 9,8 i 9,3 адпаведна.

Дарэчы, у Iзраiлi на 1 тысячу насельнiцтва прыпадае 20,6 нараджэнняў i 5,6 выпадкаў смерцi, у ЗША адпаведна — 14 i 8, Аўстрыi — 9,4 i 9,4, Германii — 8,7 i 9,5. Аднак у еўрапейскiх краiнах чалавечы патэнцыял падтрымлiваюць мiграцыйныя працэсы. За мяжой сёння знаходзiцца каля 3,5 мiльёна нашых суайчыннiкаў.

Што датычыцца знiжэння смяротнасцi, то яно, зразумела, цесным чынам звязана з умацаваннем здароўя. 56 працэнтаў смярцей абумоўлены ў нас зараз сардэчна-сасудзiстымi захворваннямi, 13 працэнтаў — анкалагiчнымi хваробамi i каля 12 працэнтаў — траўматызацыяй. У лiку знешнiх прычын гiбелi людзей называюцца няшчасныя здарэннi на транспарце, выпадкi гiбелi на вадзе, у полымi, атручэннi алкаголем, iншымi рэчывамi, забойствы. Зразумела, што Нацыянальная праграма дэмаграфiчнай бяспекi прадугледжвае ўмацаванне не толькi лячэбнага, але i прафiлактычнага накiрунку. Так, з аднаго боку, будзе развiвацца, скажам, кардыяхiрургiя, аднак будуць стварацца i школы гiпертонiка, дзе патлумачаць, чаму нельга пры галаўных болях бескантрольна ўжываць анальгiн i як карыстацца танометрам, якi павiнен быць у кожнай сям’i. Прадугледжана i правядзенне татальнай дыспансэрызацыi. Медагляды, якiмi зараз ахоплены толькi 5 мiльёнаў 300 тысяч насельнiцтва, павiнны стаць масавымi i скiраванымi на ранняе выяўленне захворванняў, своечасовае забеспячэнне лячэбных мераў.

Важная роля ў прафiлактыцы захворванняў i выхаваннi ў беларусаў пачуцця адказнасцi за ўласнае, здаровае жыццё адводзiцца сродкам масавай iнфармацыi. Як заўважыла ў сваiм звароце да прадстаўнiкоў СМI першы намеснiк мiнiстра iнфармацыi Рэспублiкi Беларусь Лiлiя АНАНIЧ, давайце ствараць культ сям’i, дзiцяцi, здароўя. З дапамогай слова, якое ў поўнай меры можна залiчыць у шэраг дзейсных медыкаментозных сродкаў.