Зрабiць адпачынак больш бяспечным

Источник материала:

Адпачынак

Падчас летнiх канiкулаў сёлета аздараўленчыя лагеры з дзённым i кругласутачным знаходжаннем наведалi 467,1 тыс. дзяцей. Прычым, зазначыла Святлана Фурс, гэта лiчба аказалася большай, чым планавалася напачатку. Павялiчыць паказчыкi аздараўлення, у прыватнасцi, удалося ў вынiку дадатковага фiнансавання з мясцовых бюджэтаў. Адначасова дадатковыя датацыi рэгiёнаў у значнай ступенi стрымалi ўзровень бацькоўскай аплаты для работнiкаў бюджэтнай сферы. Сёлета сярэднi кошт адпачынку ў лагеры з кругласутачным знаходжаннем склаў каля 300 тысяч рублёў, памер дзяржаўнай датацыi са сродкаў дзяржаўнага сацыяльнага страхавання — 175 тысяч. Тым не менш даводзiцца канстатаваць: дзякуючы «рэгiянальнай» падтрымцы непасрэдна бацькi плацiлi за адпачынак сваiх дзяцей прыкладна па 10 працэнтаў ад сабекошту пуцёўкi.

Мiж тым, не сакрэт, што найбольш вострым на працягу апошнiх гадоў застаецца пытанне стану летнiкаў. З пачатку 1990-х з-за неадпаведнасцi санiтарным правiлам i нормам, а таксама патрабаванням па пажарнай бяспецы ў краiне было закрыта 70 падобных устаноў, i ў тым лiку 25 — сёлета. Разам з тым, паводле слоў загадчыка аддзялення гiгiены дзяцей i падлеткаў Рэспублiканскага цэнтра гiгiены, эпiдэмiялогii i грамадскага здароўя Алы Малахавай, больш жорсткiя падыходы прынеслi свой плён. Па сутнасцi ў абласцях засталося ўсяго па некалькi лагераў, якiя не забяспечаны ацяпленнем i гарачай вадой. У сваю чаргу гэта прывяло да змяншэння захворваемасцi дзяцей падчас адпачынку. I плюс да таго, павысiўся аздараўленчы эфект: даследаваннi паказалi, што паляпшэнне стану здароўя адзначаецца больш чым у 82 працэнтаў школьнiкаў, якiя наведалi летнiкi.

Праўда, застаецца складанай сiтуацыя з траўматызмам. На працягу канiкулаў у летнiках траўмы атрымалi 922 дзiцяцi i ў тым лiку 178 — траўмы цяжкiя. З улiкам гэтага, лiчыць Ала Малахава, падчас падрыхтоўкi лагераў да сезона адпачынкаў-2007 трэба звярнуць асаблiвую ўвагу на бяспеку дзяцей — i ў прыватнасцi, на замацаванне футбольных варот, стан дарожак i нават на асвятленне тэрыторыi. Яшчэ адной асаблiвасцю новага сезона стануць больш жорсткiя падыходы да ўмоў пражывання. Да прыкладу, эпiдэмiёлагi маюць намер патрабаваць, каб усе жылыя карпусы летнiкаў мелi каналiзацыю.