Рэпарцёр атрымаў заданне... Здаць жыллё кватарантам

Источник материала:

Адразу заўважу, што аб многiх нюансах гэтага сегмента рынку я ведаю не па чутках, бо сам здымаў кватэры на працягу ажно 12 гадоў. Мае асабiстыя парады, спадзяюся, будуць карыснымi i для тых, хто збiраецца здаваць жыллё, i для кватарантаў.

Цi патрэбны мэбля i рамонт?

Гэта залежыць ад вашых фiнансавых магчымасцяў i рынкавага кошту здаваемай нерухомасцi. Калi вялiкая кватэра знаходзiцца ў прэстыжным раёне цi ў цэнтры мегаполiса, то лепш зрабiць сапраўды якасны рамонт i чакаць багатых арандатараў. У агенцтвах нерухомасцi на такое жыллё з боку клiентаў нават iснуюць заказы. Пры здачы невялiкiх кватэр у звычайных тыпавых дамах у спальных раёнах, у заводскай частцы сталiцы цi ў Шабанах, рабiць нейкi якасны еўрарамонт проста немэтазгодна. Iстотна павялiчыць кошт арэнды такога жылля будзе немагчыма, а абыдзецца рамонт гаспадару ў важкую капеечку.

Разам з тым нейкi касметычны рамонт жылля трэба зрабiць абавязкова. Паклеiць шпалеры i добра прыбраць у хаце можна за пару дзён. Лепш за ўсё амаль да бляску вычысцiць ванны пакой i туалет, а таксама дасканала праветрыць усё памяшканне.

З мэбляй вырашаць пытанне таксама трэба iндывiдуальна. Калi трывалыя канапы i шафы мiнулых стагоддзяў будуць надаваць кватэры нейкi своеасаблiвы шарм, то танны хлам савецкiх часоў лепш нават выкiнуць.

Па якому кошту здаваць?

Для невялiкiх кватэр спальных раёнаў цана арэнды амаль стандартная. У залежнасцi ад плошчы пакояў i канкрэтнага адраса кошт арэнды аднапакаёвай кватэры можа вагацца ў сталiцы ад 150 да 200 долараў. Каб вызначыць сваю цану ў гэтым дыяпазоне, будучаму арэндадаўцу лепш адразу набыць спецыялiзаванае выданне «Нерухомасць Беларусi» i пазнаёмiцца з умовамi арэнды падобнай да вашай кватэры. Канешне, можна ўстанавiць завышаны кошт арэнды жылля i адшукаць кватарантаў. Аднак ёсць вялiкая верагоднасць, што жыхары зразумеюць сваю памылку i хутка адшукаюць больш таннае жыллё. Наўрад цi вам захочацца яшчэ раз рабiць касметычны рамонт для новых клiентаў.

Начальнiк аддзела арэнды агенцтва нерухомасцi «Час-Пiк» Сяргей Кадол адзначае, што зараз попыт на аднапакаёвыя кватэры прыкладна ў тры разы большы за прапанаванне. Адшукаць менавiта вашага клiента на кватэру самастойна гаспадару бывае даволi цяжка. Спецыялiсты агенцтваў растлумачаць уласнiкам жылля сiтуацыю аб магчымых цэнах, аб iснуючых механiзмах здачы кватэр i ўсе нюансы аб афармленнi неабходных дакументаў. Усю гэту iнфармацыю вы атрымаеце не па чутках, а ад прафесiяналаў. Агенцтва будзе актыўна шукаць вам клiентаў i займацца афармленнем. Пры гэтым усе паслугi агенцтва для ўладальнiкаў жылля бясплатныя.

Чаму патрэбен дакумент?

Спецыялiсты агенцтваў лiчаць, што пры здачы кватэры трэба абавязкова складаць дагавор найму жылога памяшкання. У гэтай паперы неабходна зафiксаваць колькасць пакояў i агульную плошчу жылля, пералiчыць маёмасць кватэры (мэбля, халадзiльнiк, тэлевiзар i iншыя бытавыя прыборы) i яе прыкладны кошт, вызначыць цану аднаго месяца найму i тэрмiны аплаты, адлюстраваць пытаннi магчымага рамонту, колькасць i час наведванняў кватэры гаспадаром. У дагаворы трэба абавязкова прапiсаць пашпартныя даныя гаспадара i наймальнiка. Калi гэтага папярэдне пiсьмова не зрабiць, то можна трапiць у складаныя сiтуацыi. Кватарант можа пашкодзiць мэблю, сапсаваць дарагую бытавую апаратуру, залiць суседзяў цi нават спалiць кватэру. Калi ў гаспадара жылля адсутнiчаюць сур’ёзныя паперы на руках, то атрымаць нейкую кампенсацыю ад кватарантаў будзе даволi праблематычна.

Заплацi падаткi i не турбуйся

Паводле апошняй iнфармацыi экспертаў рынку нерухомасцi, сёлета ў Мiнску здымаюць кватэры цi асобныя пакоi каля 70 тысяч сем’яў i грамадзян, а плацiць падаткi абсалютная меншасць арэндадаўцаў. Падаткавiкi адзначаюць, што ў апошнiя гады колькасць законапаслухмяных арэндадаўцаў павялiчваецца, але адбываецца гэта амаль заўсёды за кошт дарагiх кватэр, якiя здаюцца ў цэнтры сталiцы або замежным грамадзянам. Астатнiя гаспадары жылля дамаўляюцца з кватарантамi «палюбоўна». Апошнiя абяцаюць «залiваць» кантралюючым органам аб тым, што яны з’яўляюцца старымi сябрамi цi далёкiмi сваякамi арэндадаўцаў i жывуць тут абсалютна бясплатна. Вядома, што зараз спецыяльныя службы падатковага ведамства пачалi больш актыўна шукаць такiх «хiтруноў». Папярэдне збiраецца iнфармацыя ад работнiкаў ЖЭСаў, участковых мiлiцыянераў i суседзяў. Парушальнiкаў падатковага заканадаўства могуць «здаць» i непасрэдна былыя кватаранты, якiм прапанавалi iстотна павялiчыць арэндную плату цi ўвогуле папрасiлi вызвалiць кватэру «на павышаных танах». У гэтых выпадках гаспадары жылля абавязаны будуць аплацiць падаходны падатак за ўвесь час здачы жылля, а таксама пеню i вялiкi штраф.

Аб якiм падатку iдзе гаворка?

Калi даход ад здачы жылля ў год не перавышае 500 базавых велiчынь, або 7,3 тысячы долараў, то плацiцца фiксаваная сума падаходнага падатку. Зараз у сталiцы яго стаўка за 1-пакаёвую кватэру складае базавую велiчыню (БВ — 31 тысяча рублёў), за 2-пакаёвую — 2 БВ, 3-пакаёвую — 3 БВ i гэтак далей.

Сёння Мiнск падзелены на 5 эканомiка-планiровачных зон. Для кватэр першай зоны да фiксаваных сум падаходнага падатку ўстаноўлены павышальны каэфiцыент — 2; у другой зоны — 1,5, а ў III, IV, V зонах — 1.

Што датычыцца арэндадаўцаў, якiя сумесна пражываюць з кватарантамi, то з кастрычнiка памер фiксаванай сумы падаходнага падатку для iх павялiчыўся ўдвая. Раней гаспадары такога жылля за арэнду плацiлi ў бюджэт 0,5 базавай велiчынi, а цяпер павiнны будуць заплацiць таксама як ад здачы аднапакаёвай кватэры — 31 тысячу рублёў, памножаную на адпаведны каэфiцыент.

Як лепш падстрахавацца ад непрыемнасцяў

Усе гаспадары, у якiх я здымаў жыллё, абавязкова патрабавалi паказаць пашпарт з мiнскай прапiскай. Толькi палова з iх згаджалася афармляць дагавор арэнды. Я абавязкова дамаўляўся з арэндадаўцамi аб тым, што кошт арэнды жылля можа быць зменены толькi раз у год, а тэрмiн арэнды магчыма скасаваць летам, папярэдзiўшы аб гэтым за два месяцы.

Натуральна, у жыццi ўласнiка кватэры могуць узнiкнуць розныя сiтуацыi, якiя парушаць i планы кватарантаў. Аднак падпiсанае ўзгадненне ўмоў памiж бакамi дае больш упэўненасцi i акрэслiвае арэндныя адносiны на ўзроўнi цывiлiзаванага супрацоўнiцтва.

Перавагу гаспадары жылля аддаюць кватарантам, якiя працуюць на дзяржаўнай працы, маюць не вельмi вялiкую сям’ю (максiмум адно-двое дзяцей), перавозяць на кватэру дарагую бытавую тэхнiку. Немалаважнае значэнне мае камунiкабельнасць кватарантаў. Арэндадаўцы большую частку iнфармацыi аб новых жыхарах кватэры атрымлiваюць ад суседзяў, з якiмi трэба жыць мiрна.